Long Banyok ngatur program ‘Jom Balik Kampung’ beserimbai enggau Krismas 2019
MIRI: Kampung Long Banyok deka ngatur program ‘Jom Balik Kampung’ sepengelama tiga hari ba ujung taun tu beserimbai enggau pengerami Krismas 2019 sereta Taun Baru 2020.
Chairman Pengatur Pius Bilong madah, program nya diatur tetiap dua taun lalu minta peranak Long Banyok datai meri bantu enggau ati ti lurus dikena nentuka program nya mujur dipejalai.
“Sida ti udah mantu program pemadu besai iya nya Patrick Kebing Kanyan ti deka melanja banner, atur panggau pemerindang sereta duit RM5000 ungkup program nya.
“Lebih 20 aktiviti pekit enggau main asal deka diatur semanjai tiga hari pengawa nya dipejalaika ila,” ku iya.
Pia mega ku iya, mayuh macham perais manah deka diberi ngagai pesereta ke ngambi bagi dalam pekit enggau aktiviti ke diatur.
“Nya alai, komiti pengatur ngelaluka mensia mayuh kandang menua tu kelebih agi peranak Long Banyok datai ngerichahka program tu.
“Kitai mega deka ngatur makai besai lalu mayuh macham aktiviti ungkup peranak genturung pendiau ngambika ulih bekaul enggau pangan diri,” ku iya.
Nitihka Pius, program nya deka richah agi nengah mayuh macham aktiviti ke diperambu ungkup bala nembiak mit, raban nembiak enggau orang tuai di Kampung Long Banyok, kelimpah meri awak ngagai sida begelumu begulai enggau diri sebilik.
“Dikearap semua peranak genturung pendiau nya sereta diri sebilik, kaban belayan enggau pangan sampal datai ngagai Kampung Long Banyok maya ujung taun tu ngerichahka agi program ke diatur nya. Mayuh agi orang, manah agi enggau lebih richah,” ku iya seraya nambah program baka nya ke udah diatur kena taun 2015.
Berebak enggau nya ku Pius, iya meri terima kasih enggau lantang ati ba sukung semua orang ti udah mantu enggau sukung ari sukut belanja ungkup program nya ngambika dipejalai enggau mujur.