Program tikas antarabansa patut dipejalaika mayuh agi di Miri: Lee
MIRI: Mayuh agi program betikas antarabansa ke patut diatur di Miri, dikena matak temuai menua luar datai ngagai mengeri besai alai ngelantangka ati lalu mega neruska program ke endang udah kala diatur.
Menteri Perengka Pengangkut, Datuk Lee Kim Shin madah, nengah program tikas antarabansa tu, Miri ulih matak mayuh agi temuai ari serata dunya.
Bejaku maya bejadi pengerami keterubah Festival Zumba Antarabangsa Sarawak ke diatur di Dewan Suarah Miri ditu kemari, Lee madah sebaka mega enggau program tikas antarabansa ke bukai, iya deka program nya terus dipejalaika jemah ila.
“Aku deka program tu, Festival Zumba Antarabansa Sarawak terus dipejalaika ba taun baru ila, lalu muka mayuh agi penyereta ba renggat antarabansa.
“Aku deka pesereta mayuh agi ari menua luar kelebih agi bala zin (jurulatih zumba) ke chukup popular betanda zumba ba renggat antarabansa, sama datai di Miri kena taun baru ila,” ku iya agi.
Lee mega ngenataika pengaga ati iya ngagai pengatur program tanda zumba di Miri udah nyambut program enggau perambu iya ti deka mantai tanda zumba tu enggau besai agi iya nya festival antarabansa.
“Sehari tu, nya udah nyadi nyata lalu aku gaga amat meda mayuh bala ke rindu pengawa tu enggau pelatih zumba ngambi bagi dalam program nyengkaum ari sekeda menua baka Indonesia, Brunei, Filipina, Korea, Republik Dominica, Romania sereta ari Semenanjung Malaysia, Sabah, ari nengeri Sarawak empu, lalu Miri nyadi tuai rumah program tu,” ku Lee agi.
Festival Zumba Antarabansa Sarawak keterubah ba taun tu mungkur tiga iku pesereta zin zumba ke popular, ZJ Chris ari Korea; Pedro Camacho ari Republik Dominica enggau Zes Ana Georgescu ari Romania.
Sama bisi datai iya nya chairman pengatur program, Zin Jean Wong.