Tambahka jalai pemansut penatai pemisi: Abang Johari
Beguna amat ngagai opis bekuasa kandang menua ngambika nemu bakani penatai pemisi diulih ari mayuh bengkah servis
KUCHING: Opis kaunsil enggau opis bekuasa di nengeri tu enda tau enda nambahka jalai pemansut penatai pemisi sida nengah mayuh bengkah servis ti diberi sida ngagai mensia mayuh.
Kepala Menteri Datuk Patinggi Abang Johari Tun Openg madah, nya beguna amat ngagai opis bekuasa kandang menua nemu bakani penatai pemisi diulih ari mayuh bengkah servis ti disediaka ba renggat sida.
“Taja pia, barang bagi chukai kaunsil enggau levi mesti dipelajarka berenggat lalu penyampau ke dipinta tauka penambah penyampau nya mesti patut ngambika enda nating rayat enggau pemayar chukai,” ku iya.
Iya bejaku munyi nya ba pengerami nutup High Performance Team (HPT) Retreat di Port Dickson, Nengeri Sembilan kena Hari Minggu nyin tadi.
HPT nya program ninting taun Pengereja Pengawsa Perintah Sarawak ke lebih agi dikena nempa ‘sinergi’ kereja entara bala ketuai opis kelimpah nyadi platform ngagai sida berandauka sekeda isu kritikal sereta meransang kerejasama ke manah agi entara mayuh bengkah ejensi dikena ngangkatka pemanah meri
servisi enggau projek.
HPT taun tu berambaika leka jaku “Memberdayakan Pihak Berkuasa Tempatan untuk Pelaksanaan Inisiatif Pemerintah Pintar” fokus berandauka chara ngangkatmanah standard servis opis bekuasa kandang menua ke pemaik rayat.
Ku Abang Johari, proses ngumpul penatai pemisi ari mayuh bengkah jalai pemansut lalu nyampur nya nyadi asil opis bekuasa kandang menua endang deka nyadi semua asil ke diulih.
“Nya alai, Perintah Sarawak mega mesti nengah proses ke sama dikena nambahka asil Sarawak ari jalai pemansut ke patut bepelasarka undang-undang.
Ngenang sentang chukai nyual produk petroleum enggau gis ungkup eksport ari Sarawak, ambika chunto penatai pemisi injiniring, Abang Johari madahka chukai ke dipinta nya setipak enggau kuasa ke diberi Konstitusyen ngagai Sarawak.
“Chukai tu deka meri penatai pemisi tambah ngagai Sarawak sepenyampau RM3 bilion,” ku iya.
Ku iya baru, jalai pemansut alternatif ti dipelanja Bank Pemansang Sarawak mega nyadi chunto bukai baka ni duit galau tau dikena melanja program pemansang strategik ti nadai ngurangka rizab menua.
“Sekeda projek baka bekal ai enggau nyendiaka perengkaguna ke patut dikena ngerembaika ekonomi sereta ngemansutka penatai pemisi deka dibayar pulai ngagai bank.
“Nengah chara tu perintah ulih mulaika penyampau ke diinjau ngagai bank,? ku iya.
Berebak enggau nya, Abang Johari nyemetak madah atur tusun pasar ke betul nyaup opis bekuasa kabdang menua ngerembaika pelasar penatai pemisi sida.
Bechuntoka pasar satelit Sibu Jaya di Sibu, ku iya keterubah suba pasar nya enda ulih ngerembai enggau manah tang pengudahka dilangkar sereta ditusun baru, pemansang komersial pasar nya nyadi manah.
Ku iya, jalai alternatif ke diperambu ari Sibu nya udah nyaup pemansang ba Sibu Jaya.
Ngenang pekara bukai, iya madahka perambu perintah nengeri numbuhka servis penerebai dikena nambahka kaul nengah langit ke Sarawak nya enda nyengkaum pengawa meli bilun.
Bepelasarka peneleba, iya madahka Sarawak bisi pilih nyuwa bilun laban nya nyadi pilih ke manah agi dibandingka enggau meli bilun.
“Chara tu lalu meri pemaik ngagai potensial dagang temuai Sarawak,? ku iya.
Dulu ari nya, Sekretari Perintah Nengeri, Datuk Amar Jaul Samion nerangka jurai sentang buah penemu enggau perambu mayuh bengkah makmal ngagai Kepala Menteri.
Urung 200 ketuai opis, pemesai kanan, datuk bandar, ketuai dewan dan kaban kaunsil ngulu program HPT pengelama empat hari nya.
Sama bisi ngulu pengerami nya Menteri Pelajar, Sains enggau Pansik Teknologi, Dato Sri Michael Manyin Jawong; Menteri Utiliti, Dato Sri Dr Stephen Rundi Jawong; Menteri ba Opis Kepala Menteri (Integriti enggau Ombudsman) Datuk Talip Zulpilip; Menteri Kaunsil Kandang Menua enggau Pengawa Berumah, Dato Sri Dr Sim Kui Hian enggau Menteri Dagang Temuai, Senia enggau Main Asal, Datuk Abdul Karim Rahman Hamzah.
Sama bisi datai mega, Menteri Muda ba Opis Kepala Menteri (Pekara Islam enggau DBKU) Datuk Dr Abdul Rahman Junaidi;Menteri Muda Kaunsil Kandang Menua enggau Pengawa Berumah, Datu Dr. Penguang Manggil enggau Sekretari Perintah Nengeri Sarawak, Datuk Amar Jaul Samion.
Taja pia, barang bagi chukai kaunsil enggau levi mesti dipelajarka berenggat lalu penyampau ke dipinta tauka penambah penyampau nya mesti patut ngambika enda nating rayat enggau pemayar chukai. Datuk Patinggi Abang Johari Tun Openg Kepala Menteri