Program mikro kredit AIM nyata dipeda ulih ngemansangka ekonomi rayat
SARIKEI: Program mikro kredit ti dipejalaika Amanah Ikhtiar Malaysia (AIM) nyata dipeda ulih ngemansangka ekonomi rayat ke lebih agi ti bekaul enggau pengawa dagang.
Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madah be macham empas positif mujur diulih ari program nya.
Ku iya, pemeri mikro kredit ari AIM ngagai raban bepenatai pemisi mit nyadi pelasar meransang pemansang mayuh bengkah dagang. “Sepenyampau RM20,956,379.50 puku diungkupka ngagai kaban AIM Sarikei taun tu tang naka tengah bulan Oktober tu seenyampau RM9,505,379.50 mengkang apin dikena.
“Nya alai, pramh ke bisi pengerindu dalam bidang ke bekaul diperansang ngerebut peluang ti disediaka AIM ngambika sida bulih rejeki ke mayuh,” ku iya lebuh bejadi Fiesta Sahabat AIM 2019 Sarikei ditu ensanus.
Antara program ke diatur beserimbai enggau fiesta nya baka pekit nyura, ngaga bungai, pemandang enggau bejual Fiesta Sahabat AIM 2019 ‘Raikan Sahabatku’ Sarikei.
Kaban Kunsil Nengeri Kuala Rajang nya madah, pemeri mikro kredit mujur ngangkatka orang indu ba pengawa dagang ke lalu nyaup nyungkak ekonomi ruang bilik enggau raban bansa.
Bisi empat anugerah disuaka ngagai kaban AIM iya nya Anugerah Sahabat Usahawan, Anugerah Blok Emas FC 2019, Anugerah Kakitangan Blok Emas FC 2019 enggau Anugerah Sahabat Emas 2019.
Ba pengerami nya, Len turut mega bisi ngungkupka belanja RM10,000 ngagai Kelab Usahanita Berjaya
Sarikei dikena mantu ngenujurka sekeda aktiviti kelab nya.
Sama bisi datai Direktor Operasyen Borneo AIM Che Mahdi Idris, Menijar AIM Sarawak Tengah, Hasbi Naziri enggau Penulung Menijar AIM Kandang Tengah Menua, Abdul Hafiz Soni.