Hizwan: Nadai Perintah Malaya ari baruh pegai PH
MIRI: Nadai leka jaku Perintah Malaya laban perintah besai ke ari baruh pegai Pakatan Harapan (PH) tetap ngintu pekara dikemerat semua nyengkaum rayat Sabah enggau Sarawak.
Sekretari Politik Menteri Pengawa Berumah enggau Kaunsil Kandang Menua, Nor Hizwan Ahmad madahka sentimen mida perintah ari baruh siti payung menua Malaysia enda patut nyadi.
“Kitai ukai datai ke Sarawak dilabel nyadi perintah Malaya tang nyadi rayat Malaysia lalu sentimen ke baka diputar belit sekeda orang,” ku iya ba pengerami Makai Pengasuh Ngumpul Duit Turu Indu PKR Baram ditu malam ensanus.
Hizwan ngarika Menteri opis nya, Zuraida Kamaruddin nyemetak madahka Sarawak mega bulih ungkup belanja ba Bajet 2020.
“Perintah PH nadai kala ngenggaika hak rayat Sarawak tambah mega nengeri tu nerima belanja ungkup pemansang ke pemadu mayuh iya nya
RM4.4 bilion dalam Bajet 2020,” ku iya.
Berebak enggau nya, Hizwan mejah Bajet 2020 ti lebih berat ngagai rayat Semenanjung Malaysia enti dibandingka enggau rayat Sabah enggau Sarawak.
Ba pekara bukai, pengundi di sitak Baram mesti meri sukung penuh ngagai Roland Engan nyema dichalun ba DUN Telang Usan maya Pengawa Bepilih Nengeri (PRN) Ke-12 ila.
Roland alah mimit ngagai penyandang kerusi nya, Dennis Ngau ke semina 167 undi ti mandangka peranak menua pesisir deka ke ubah.
“Aku deka ke semua peranak di Baram meri sukung penuh ngagai Roland ngambika nyadi pengari rayat laban iya siku orang ke chakah gawa,” ku iya.
Ku iya, PH mesti menang semua kerusi di Baram nyengkaum DUN Telang Usan, Marudi enggau Mulu ngambika ulih nukar lanskap pegai perintah nengeri.
“Kitai nyata meda peranak Baram deka ke ubah enggau pengingin deka ke perintah baru lalu kami ngarapka sukung nya dipeda nyadi nyata maya Pengawa Bepilih Nengeri (PRN) ila,” ku iya.
Hizwan mega deka ke semua pengundi di Baram meri sukung penuh ngagai chalun PH ngambika ulih numbangka perintah nengeri ke diatu.
“Perintah Barisan Nasional (BN) ti udah lama merintah ulih dialahkan maya Pengawa Bepilih Besai (PRU) lalu enda patut pekara sama enda nyadi maya PRN Ke-12 ila,” ku iya.