Belawai patut bisi stesyen petrol mit
TANJUNG MANIS: Stesyen petrol mit patut ditumbuhka dalam kandang Genturung Pendiau Belawai ngambi ngemudahka peranak menua nya ngisi minyak perengka pengangkut sida, pia ku Chairman Serakup Pengelantang pendiau Bumiputera Malaysia (PKBM) Sarawak, Dato Sri Abang Aditajaya Abang Alwi.
Ku iya, perengkaguna nya besai amat reti ngagai peranak menua nya laban stesyen minyak ke bisi jauh ari Genturung Pendiau Belawai.
Ku iya baru, bisi peranak genturung pendiau nya meli stok petrol di pasar Sibu laban pengempu stesyen nya natak penyampau minyak petrol ke dibeli.
“Kami bisi stesyen di Tanjung Manis tang jauh lalu aku deka madah bisi tatak meli minyak petrol din, lalu sida enda ngemendarka meli ba penyampau ke mayuh.
“Sambika chunto, enti kerita nuan muat diisi 30 liter minyak petrol tang semina dikemendarka meli 10 liter aja sebuah kerita.
“Nya alai nya enda patut lalu ngenusahka peranak ditu ,” ku iya.
Iya dikrandau pengarang berita pengudah sesi chabut undi Pengawa Bepilih Parti Keadilan Rakyat Pampang Tanjung Manis ke diatur ba Opis PKR Tanjung Manis, ensanus.
Aditajaya siku ari chalun ungkup pangku pengawa ketuai pampang lalu iya disatup Dr Raduan Serap.
Berebak enggau nya, iya mega madahka sekeda endur engka engkeman alai numbuhka stesten minyak mit.
“Antara nya di Kampung Belawai ke diuan lebih 4,000 iku, di Kampung Jerijeh enggau Kampung Rajang ke sama diuan lebih 1,000 iku.
“Ba kandang rumah panjai, aku empu ngagai siti ke siti endur meda penyampau tubuh enggau utai ke diguna peranak nya dulu,” ku iya.
Iya mega madah bisi merambu muka opis PKR di Kampung Belawai ke chukup disikap enggau sebuah dewan ke muat alai 2,000 iku.
Pengawea bepilih Pampang Tanjung Manis deka diatur 3 November ti dekadatai lalu nyadi pampang ke-222 ditumbuhka di Malaysia ti nyadika pampang parlimen ke penudi endar ditumbuhka.