KMKK bebendar mantah perambu numbuhka MPKK
KUCHING: Ketuai Raban Bansa Melayu Bagi menua Kuching (KMKK) bebendar mantah perambu numbuhka Kaunsil Ngaduka Komuniti Genturung Pendiau (MPKK) di nengeri tu ti deka di pejalaika perintah Pakatan Harapan (PH).
Jaku mantah nya dipansutka ba sebengkah aum media ditu kemari betuaika Temenggong Dato Helmi Mohd Gol begulai enggau 110 iku ketuai raban bansa Melayu ari bagi menua Kuching.
Taja pia ku Helmi, taja pan mantah ukai reti kami ngelaban perintah besai.
“Aku irau amat ati enggau pengawa numbuh MPKK tu nempa penyarut ba renggat nembiak redak.
“Kami meda pengawa perintah besai numbuhka MPKK nya engka bisi niat deka mambarka kitai ba renggat nembiak redak.
“Ba penemu aku kediri pengawa numbuhka MPKK tu endang enda patut laban kitai udah bisi Komiti Pemansang enggau Pengelikun Genturung Pendiau (JKKK),” ku iya ba aum media kemari.
Dulu ari nya Pemancha Melayu Kandang Menua Kuching Utara, Roshidi Junai ke mega chairman serakup KMKK bela bisi mansutka penemu iya sentang pengawa numbuhka MPKK.
Iya ke bebendar mantah MPKK ditumbuhka bepenemu ke alai pengawa numbuhka MPKK ti dipejalaika perintah PH tu endang ngembuan tuju deka nguasa baru nengeri Sarawak nengah chara alus.
Nya alai ku iya, siti resolusyen deka digaga minta Kunsil Nengeri (DUN) Sarawak ngaga undang-undang ke lebih agi dikena nagang penama MPKK ke Sarawak.
“Kitai udah bisi JKKK lalu kami enda nerima MPKK laban nya enda nemban ba kitai di Sarawak sereta semina deka mambarka rakat kitai,” ku iya nyemetak.
Berebak enggau nya, kemari Helmi enggau beberapa iku pengari ketuai raban bansa ke bukai deka betemu enggau pengari Opis Kepala Menteri bekaul pekara nya.
Nyema bisi pematut ku iya, siti seminar ke mungkur semua ketuai raban bansa deka diatur alai mantaika jaku bantah ba pengawa numbuhka MPKK di Sarawak.