PRN: 30 peratus kuota ungkup chalun indu PKR
Taja pia pemutus nya bepanggai ba ketuai PKR Pusat nyengkaum ngengkahka siku chalun di Baram
MIRI: Orang Indu Parti Keadilan Rakyat (PKR) Sarawak meri pengelebih deka ngengkahka kuota 30 peratus ngagai chalun orang indu maya Pengawa Bepilih Nengeri (PRN) ke12 nyengkaum ngengkahka siku chalun di Baram.
Kitai mega deka siku chalun indu dipelaba diengkah ba kerusi DUN Telang Usan, DUN Marudi tauka DUN Mulu maya PRN ila.
Nurhanim Datuk Mokhsen
Ketuai Indu PKR
Ketuai Indu PKR, Nurhanim Datuk Mokhsen madah, taja pia nya bepanggai ba pemutus ketuai PKR Pusat.
“Kitai mega deka siku chalun indu dipelaba diengkah ba kerusi DUN Telang Usan, DUN Marudi tauka DUN Mulu maya PRN ila,” ku iya maya Pengerami Makai Lemai Pengasih Ngumpul Duit Turu Indu PKR Baram ditu malam ensanus.
Nurhanim madah, nya seriris enggau juluk indu PKR Sarawak ngengkahka penuduk 30 peratus ungkup chalun orang indu maya PRN ti deka datai ila.
“Orang indu ngembuan pengawa enggau hak ngaga pemutus lalu raban orang indu udah mayuh mantu chalun pengawa bepilih PKR.
Berebak enggau nya, kitai deka orang indu diberi peluang nyadi chalun maya PRN ila nyengkaum ngengkahka siku chalun di Baram,” ku iya nerang.
Ku iya, juluk Indu PKR
Sarawak deka numbuhka 31 pampang orang indu serata nengeri tu ba tengah taun 2020 dikena ngenegapka pangku pengawa orang indu parti nya ba renggat nembiak redak.
Nitihka rikod, Indu PKR Sarawak diatu bisi 22 pampang nyengkaum ti deka ditumbuhka di Tanjung Manis enda lama agi.
“Indu PKR Sarawak merambu numbuhka dua agi pampang indu di Santubong enggau Selangau,” ku iya.
Berebak enggau nya, Sapit Direktor Komiti Pengawa Bepilih PKR Sarawak, Baharuddin Datuk Mokhsen madah peminta nya deka diperundingka baru nyengkaum beratika pekara chalun nya ulih menang.
“Kitai berundingka peminta meri 30 peratus ungkup chalun indu enggau peluang chalun nya ulih menang lalu kitai besedia tumu agi nyendiaka chalun
PRN,” ku iya.
Baharuddin madah, enti nadai chalun tauka raban ti tegap, juluk PKR ti deka menang maya PRN ila enda mujur nyapai tagit nya.
“Tanggungpengawa aku nya nyendiaka chalun PRN laban kitai enda ulih menang enti nadai chalun ke tegap sereta nentuka chalun nya mujur maya kimpin pengawa bepilih ila,” ku iya.
Baharuddin ngelalau semua kaban PKR Sarawak ngambika fokus deka menang sereta ngubah atur pengereja pengawa perintah nengeri diatu.
Sama bisi datai iya nya Sapit Speaker DUN Selangor Dr Daroyah Alwi, Chairman Polisi Rumah Panjai Menua ke mega Kaban Parlimen Saratok Ali Biju, Sekretari Politik Menteri Pengawa Berumah enggau Kaunsil Kandang Menua, Nor Hizwan Ahmad sereta bala ketuai PKR ke bukai.