Program ‘Intergenerasi Komuniti Prihatin’ JKM pelasar ngaul komuniti
KUCHING: Pengerami bejadi Program ‘Intergenerasi Komuniti Prihatin’ ke diatur Opis Pengintu Pengelantang Mensia Mayuh (JKM) Bagi Menua Kapit nengah kerejasama Desa Bina Diri Kuching di Rh Japok, Nanga Senyaro, Sungai Musah, Katibas Song, ba kandang menua Sri Aman diatur richah bedau lama udah.
Program nya diatur sepengelama dua hari dipenyadi Menteri Muda Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Datuk Francis Hardin Hollis.
Tuju program tu diatur ngambika Opis Pengintu
Pengelantang Mensia Mayuh datai bejalaika tanggungpengawa kediri ngaul komuniti begulai enggau ejensi kaban strategik opis.
Mayuh macham aktiviti ti dipejalaika baka licha bomba enggau demonstrasyen ari Balai Bomba enggau Penyah Penusah Malaysia Song, pengawa peresa pengerai ari Opis Pengerai Song, program ‘jejak kasih’ ari Desa Bina Diri Kuching, Sukaneka, pekit karaoke enggau pengawa nyuaka kerudi roda ngagai klien.
Nengah program nya, mensia mayuh bulih pemaik ari aktiviti ke diatur lalu bisi ngasai penumbuh opis pengintu pengelantang ti endang dikelala ba pengawa mutarka penanggul enggau isu rama mensia mayuh.
Sama bisi datai ba pengerami tu iya nya pengari Pemangku Direktor Opis Pengintu Pengelantang Mensia Mayuh (JKM) Nengeri Sarawak, Mohd Guntor Rajaee; Ketuai Pampang Penerit Adat Opis Pengintu Pengelantang Mensia Mayuh Nengeri Sarawak, Harry Silas Tirau; Pengereja pengawa Desa Bina Diri Kuching, Tiong Kunyok; Pemesai Opis Pengintu Pengelantang Mensia Mayuh Bagi Menua Kapit, Dariel Thiong Yiew Seng; Penghulu Galau Melina sereta pengari Pemesai Pelilih Song, Mohd Firdaus Abdullah @ Liang.