SST: Petronas benung berandauka pekara nya enggau perintah nengeri, perintah besai
KUCHING: Petroliam Nasional Berhad (Petronas) benung berandau enggau kededua, perintah nengeri enggau besai bekaul enggau bayar chukai nyual (SST) produk petroleum.
Chairman PETRONAS, Datuk Ahmad Nizam Salleh madah, pengawa berandauka pekara nya benung dipejalaika.
“Kami benung berandau, agi berandau.
“Petronas agi berandau enggau perintah nengeri sereta perintah besai. Dalam pemansang,” ku iya lebuh dikerandau raban pengarang berita pasal Perintah Sarawak deka neritka undang-undang nyema PETRONAS enda mayar SST produk petroleum ngagai nengeri tu.
Dulu ari nya, iya datai ba pengerami bejadika
Petrosains Playsmart Kuching ba Dewan Suarah Kuching ditu, kemari.
Kena 13 November tu tadi, Kepala Menteri, Datuk Patinggi Abang Johari Tun Openg lebuh ti nyimpul jurai Aum Ke-2 Penggal
Ke-4 Kunsil Nengeri (DUN) Sarawak Ke-18 madah Petronas enda tau enda mayar SST produk petroleum ti ditukuka Kontroller berengkah 1 Januari 2019.
Abang Johari madah nyema Petronas enda mayar chukai nya ke udah dipansik, aksyen undangundang deka dipejalaika ngagai kompeni nya dikena ngulihka baru chukai ke bedau dibayar.
Kelimpah ari nya Ahmad Nizam lebuh ditanya kemaya aum entara perintah besai, nengeri enggau Petronas deka diatur baru, iya madahka pekara nya bepanggai ba perintah besai.
“Kami nyerahka nya ngagai perintah besai,” ku iya nyaut enggau pandak.
Taja pia ku Ahmad, Petronas tetap nempa kerejasama rat enggau Perintah Sarawak.
“Tang kaul kami enggau nengeri tu, kami Petronas nempa kerejasama rat enggau Perintah Nengeri,” ku iya madah ngagai raban pemberita.