Projek ngaga Jalai Tebing Tasik, Jalai Besai Kedua dikelaluka rayat menua pesisir
KUCHING: Inisiatif ngaga ti dipejalaika di nengeri tu, chukup dikelaluka rayat menua pesisir.
Menteri Muda Infrasrtuktur enggau Pemansang Palan Penyangkai Kapal Datuk Julaihi Narawi madah, taja pan kededua projek nya agi dalam fasa dipejalaika tang nya diaku rayat di menua tu.
“Laban pengawa ngaga Jalai Besai Pan Borneo diatu agi enda entu meruan, rayat kitai milih nengah jalai tebing tasik enggau Jala Besai Kedua ti dipejalaika perintah nengeri.
“Sida gaga ati enggau kededua projek besai perintah nengeri tu ke nyadi jalai alternatif ke pemadu manah ngagai Jalai Besai Pan Borneo,” ku iya lebuh bejaku ba Pengerami Makai Lemai Aum Injinir Bagi Menua Ke-21 ditu, kena malam Hari Empat tu tadi.
Julaihi bebendar madah, taja pia enda ulih dikeenggaika pengawa ngaga Jalai Besai Pan Borneo tetap dikemeratka ke pengelantang enggau penguntung ngagai rayat Sarawak.
Diatu, ku iya ke deka ditemu iya nya pengulih ngaga kededua projek besai iya nya jalai tebing tasik enggau Jalai Besai Kedua, ti udah diberi ngagaiOpis Kereja Sarawak (JKR) Sarawak ti dikearapka ngaga projek nya.
Nitihku iya kededua perojek nya begunaka ungkus belanja RM11 bilion udah tentu nerima pengarap tinggi ari rayat.
“Kitai enda napi penanggul jalai pemansut belanja ari kapasiti RM11 bilion dikena ngaga nya.
“Semina ke deka ditemu diatu iya nya pengulih kitai ngaga kededua projek nya lalu nya pemar besai ti diberi ngagai kitai lalu kitai patut nyapai pengarap rayat ba projek tu,” ku iya.
Berindik ari nya ku iya, JKR kelebih agi Injinir Bagi Menua (DE) menijar kandang menua bejalaika pengawa ti beguna amat dikena nentuka pejalai dua projek besai nya ulih nyapai pekara ti dikearapka.
“Aku pechaya taja pan nya nyadi siti pemari besai ti udah diberi ngagai kami, JKR kelebih agi ba renggat bagi menua begulai enggau indu opis sereta kandang menua ulih ngaga nya,” ku Julaihi.
Bisi bisi datai Sekretari Mendam Opis menteri infrastruktur enggau pemansang Palan Penyangkai Kapal Datu Safri Zainuddin, Direktor JKR Sarawak Datu Zuraimi Sabki enggau chairman pengatur ti mega Injinniir Injinir Bagi Menua JKR Serian, Christopher George.