Petrosains PlaySmart nyaup negapka pelajar STEM
KUCHING: Perintah Sarawak chukup ngemeran sereta ngemeratka pemesai guna penemu digital kelebih agi ba raban biak, dikena ngenukuka rayat nengeri bulih penguntung ari ubah teknologi dunya enggau penatai Revolusyen Industri 4.0 (IR 4.0).
Kepala Menteri, Datuk Patinggi Abang Johari Tun Openg madah, penemu digital ti dikemeran sereta dikemeratka nya baka teknologi Big Data, Artificial Intelligence (AI), robot, coding enggau ke bukai.
Ku iya, Strategi Ekonomi Digital ti benung dipejalaika nengeri tu ari taun 2018 ngagai 2022, entara nya baka ngerintaika atur strategik dikena ngenegapka pelajar STEM enggau ICT ba sekula primari, sekondari enggau institusyen pelajar tinggi dikena nempa pengereja pengawa ti bepenau dalam pemansang ekonomi digital Sarawak.
“Nempa orang ti bepenau tauka pandai teknologi enggau digital betikas dunya ukai pekara mudah. Begunaka penyakah, kerejasama sereta sukung ari semua nyengkaum korporat enggau gerempung ukai dikuasa perintah, institusyen alai belajar baka Petrosains ti seruran ngemeran sereta ngemeratka pelajar dalam pengelandik STEM iya siti ari institusyen ti setipak dalam mantu kitai nyapai juluk tu.
“Berindik ari nya, penumbuh Petrosains PlaySmart ba Dewan Suarah tu chukup manah laban nya ulih nyukung enggau mantu pengawa belajarka STEM enda formal sereta di luar bilik kelas.
“Kandang endur ti nyelai sereta interaktif disediaka PlaySmart tu ulih nempa pengerindu enggau runding deka nemu raban biak pasal bidang STEM enggau pengelandik dalam bidang STEM iya nya pelasar beguna dikena ngenegapka penemu digital,” ku iya.
Abang Johari madahka pekara nya dalam teks jaku iya, ti dibacha Menteri Nembiak Lumba enggau Main Datuk Abdul Karim Rahman Hamzah, ti ngarika iya bejadika Petrosains PlaySmart Kuching ba Dewan Suarah Kuching ditu, kemari.
Ku Abang Johari, nitihka penerang ti dipadahka ngagai iya, Petronas nengah Petrosains mayuh ngatur program pelajar ba sekula kelebih agi di menua pesisir, woksyop ungkup pengajar enggau kem pelajar ungkup nembiak.
Kerejasama ti baka nya ulih ngemaju, ngadu tauka ngatur sereta bejalaika program ti bekualiti, nitihka agenda sosial perintah lalu setipak enggau juluk nempa raban bansa ti bepenemu ti ulih mantu nyapai tuju ti sama.
“Aku ngarapka Petronas terus ngaga mayuh agi program ti kreatif enggau inovatif baka Petrosains PlaySmart tu.
“Laban nengah kerejasama ti baka tu , aku arap bendar kitai ulih sama nyapai juluk ti deka nempa raban bansa landik STEM enggau digital,” ku iya.
“Aku ngarapka rayat Sarawak deka ngena peluang ti disediaka tu enggau manah laban mayuh penguntung ti diulih maya ngelawa Petrosains PlaySmart tu kelebih agi penemu enggau pelajar ke chukup berega ti bisi disediaka enggau nadai bebayar,” ku iya.
Dulu ari nya, dalam jaku pengelalu Chairman Petronas Datuk Ahmad Nizam Salleh temegah ati kelebih agi nengah kerejasama entara Petrosains enggau Opis Menteri Nembiak Lumba enggau Main Sarawak ti nyadi tuai pengatur Petrosains Playsmart di Kuching.
Nitihku iya, di serata menua Malaysia ke diatu bisi empat Petrosains PlaySmart nyengkaum di Kuching.
“Bisi empat Petrosains PlaySmart di serata menua, iya nya ba Perbadanan Perpustakaan Awam Johor di Johor Bahru, Perbadanan Perpustakaan Awam Pahang di Kuantan enggau Perpustakaan negeri Sabah di Kota Kinabalu lalu ke pemadu baru, sehari tu (kemari) ti keempat ba Dewan Suarah Kuching.
“Petrosains PlaySmart ditumbuhka Petrosains ti nyadi palan sains satelit dikena nyendiaka peneleba palan sains ngagai mensia mayuh di luar Lembah Klang enggau mai Petrosains semak agi ngagai mensia.
“PlaySmart tu disikap ngena pengawa pemandang interaktif sereta nyendiaka program ti bepelasarka STEM, sebaka enggau ke bisi disediaka ba palan besai Petrosains di KLCC,” ku iya.
Petrosains PlaySmart Kuching dibuka ngagai mensia mayuh ninting Hari Dua (Selasa) ngagai Hari Minggu ari pukul 9 pagi ngagai 5 lemai (tutup Hari Lima pukul 12 tengah hari ngagai 2 lemai).
Petrosains PlaySmart ditutup ninting Hari Satu enggau kemisi besai (Hari Raya Aidilfitri, Hari Raya Aidiladha, Hari Gawai enggau Hari Krismas).
Sama bisi ngulu pengerami nya kemari Sekretari Perintah Nengeri Datuk Amar Jaul Samion, Menteri Muda Nembiak Lumba enggau Main Datuk Snowdan Lawan enggau ke bukai.