Tekad Hidrolektrik Baram tetap enda digaga
Projek Tekad Hidrolektrik Baram nya udah dikinsil kenyau ari taun 2016
KUCHING: Sarawak tegap enggau pemutus enda neruska projek Tekad Hidrolektrik Baram ti dikinsil ba taun 2016.
Menteri Utiliti, Dato Sri Dr Stephen Rundi Utom madah projek Tekad Baram udah ditangguh sementara ketegal berundingka guna enggau ke bukai.
“Niang Tok Nan udah nginsil projek tu lalu netapka moratorium ba projek nya ti nekul ari dikemansangka.
“Kelimpah bisi guna ketegal berumban kami deka meda chara ke pemadu engkeman dikena ngeluarka kuasa tang ke diatu kami dilalau enda nyebut sentang Baram,”ku iya.
Iya madah munyi nya ba aum media pengudah pra-bejadi Minggu Kuasa Antarabansa (IEW) 2020 di Auditorium Menara LCDA ditu kemari.
Sarawak ku Rundi, bisi bekal kuasa ti lebih ari chukup dikena guna domestik enggau ke tuju eksport.
Ku iya, bisi mayuh chara ngeluarka kuasa ti tau enda
Menteri Utiliti
ibuh muka palan besi ke tuju ngaga tekad ai baka solar melepung ba tekad ai ke bisi diatu, iya nya di Batang Ai enggau Bakun.
“Kitai mesti nyemetak madah ditu ke alai kitai beratka rampa menua enggau pengidup diatu.
“Siti agi agi, nama utai ti digaga kami nengah Sarawak Energy endang nitihka standard antarabansa,” ku iya.
Nengah pemansang baru di Kalimantan ku Rundi, nya udah tentu deka meri penguntung besai ngagai
Sarawak nengah Sarawak Energy ke nyadi pemekal kuasa.
Ku iya, Sarawak bisi ngaasika penatai pemisi ke manah ari Kalimantan nengah eskport kuasa ke menua nya nengah Sarawak Energy.
“Kitai diatu mega benung berandau deka mekal kuasa ke Sabah lalu bisi perambu Sarawak Energy deka bekerejasama enggau kompeni ari Indonesia ngemansangka pemansut kuasa di menua sida.
“Enti perambu tu mujur, nya deka meri penguntung ngagai kitai enggau sida (Indonesia),” ku iya.