Mawan: Apai indai enda patut ngelempaika tanggungpengawa ngajar anak ba pengajar aja
SIBU: Dikena ngemeran sereta ngetanka adat enggau main asal raban bansa Iban ba nengeri tu, Gerempung Main Asal Dayak Sibu (KEMADA) udah mujur ditumbuh kena bulan Julai taun nyin kemari.
Chairman KEMADA Jackery Chukan madah, gerempung tu udah bulih pemendar ari Opis Ngerejista Gerempung (ROS) enggau mujur.
“Diatu KEMADA ngembuan lebih ari 30 iku raban lalu kami suah diundang datai ngagai program perintah enggau opis company luar, baik ke ba luar Sarawak tauka luar menua,” ku iya lebuh berandau enggau pengarang berita kemari.
Jackery madahka tuju KEMADA tu ditumbuhka kena ngetanka main asal kitai Iban tauka Dayak, ambika chunto baka main Gendang Pampat ti majak enda dikelala tauka ditemu bala nembiak rebak kemaya hari tu.
“KEMADA tu nyadika pelasar dikena kami mantaika main adat asal kitai ngambika enda lenyau laban arus pemansang dunya digital baka ke diatu nyentukka ila,” ku jaku tangkan iya.
Nitihka ku Jackery, KEMADA naka ke diatu udah ngatur tauka ngaga kelas belajar main Sape, Ngajat enggau Gendang Pampat.
“Ngagai bala mayuh ti deka nyadi raban gerempung tu tauka ngembuan pengerindu ke main adat asal Iban/Dayak, kita endang diundang sereta dikangau datai ngambi neguh sereta ngetanka adat enggau main asal kitai tu,” ku iya baru nampung jaku.
Barang sapa ti ka betanya enggau lebih silik agi bekaul enggau KEMADA tu, ulih betelefon ngagai lumur Jackery empu iya nya 0198390839.
KUCHING: Apai indai patut komited nyendiaka pelajar ngagai anak sida sereta enda ngelempaika tanggungpengawa nya ba pengajar aja.
Kaban Kunsil Nengeri (ADUN) Pakan Tan Sri William Mawan Ikom madahka, sida pengajar sigi udah diberi latih kena ngajar, tang tanggungpengawa ngajar anak nyadi orang ke ngembuan pengelandik sereta mujur iya nya bepun ari apai indai.
“Berebak enggau nya, aku ngansak apai indai di Sarikei ngelimpangka awak kena meri sukung sereta meransang anak sida kelimpah nitihka chara apai indai bukai ke bisi anak ti nyulut ba pelajar,” ku iya.
Iya madahka pekara nya lebuh bejaku ba Pengerami Bejadi Pekit Belanda Neresa Kampung enggau Bejadi Pintu Gerbang Sekula Primari (SK) Assun Sarikei ditu, bedau lama ti udah.
Ku Mawan nambah agi, apai indai ulih minta penemu enggau resia pemujur ari apai indai nya nyentuk anak sida ulih nyulut dalam pelajar sida.
“Beserimbai enggau nya mega, penyulut tu ulih nyadika peransang ngagai apai indai. Apai indai patut mandangka pemendar sereta nyadi chuto ti manah kena meransang juluk ati anak sida ba sekula ngambika belajar bebendar sereta bulih pemujur dalam akademik sida.
“Kepala Pengajar SK Assun Churchill Frank Machop madah ke aku iya nya tikas penyulut nembiak ba ditu amat tinggi sereta sida bisi potensial kena nyapai penyulut dalam akedemik sereta besemekih enggau nembiak ke nyulut ba sitak bukai,” ku iya nerang.
Mawan nambah, nyadi apai indai patut meri sukung ngagai anak sida sereta sekula enggau chara ti manah nyengkaum meri kerejasama enggau bala pengajar sereta raban bukai di sekula.
“Kitai patut begempung enggau pengajar mantu pelajar anak kitai,” ku iya.
Iya mega ngigatka apai indai ukai mega nguna Gerempung Apai Indai enggau Pengajar (PIBG) nyadika palan kena bekerejasama, laban sida ulih diri empu datai ngagai sekula meri penemu pia mega pengajar ulih datai ngagai rumah panjai enti nyema nembiak sida enda datai ngagai sekula tauka bisi penanggul ke bukai.
“Keterubah nya, ku meda pengeransing tauka pengandal deka belajar nyau majak kurang kelebih agi ba kandang menua pesisir. Penyampau nembiak diau ba buding majak kurang, ukai aja ba Serikei tang ba sitak ke bukai.
“Ba Pakan mega penyampau nembiak diau ba buding nyau majak mimit laban akses jalai alun enggau bisi perengka pengangkut diri empu ngasuh sida deka agi diau ba rumah panjai,” ku iya nambah agi.
Ba pekara nya, iya madah, ba rumah panjai bisi semua ti chukup disedia, sereta enda dikemataka pengajar.
“Sida udah nadai nemu tunga kuing kena nyapai penyulut ba pelajar. Pekara tu ngasuh kaul entara sekula enggau nembiak majak jauh.
“Dalam pekara tu, apai indai, pengajar enggau raban bukai patut begerempung sereta aku ngelanggur ngambika simposium tauka licha diatur enggau kerejasama Pemesai Pelajar Pelilih Menua, Kaunsil Kepala Pelajar enggau Kaunsil Pengajar ba Sarikei,” ku iya.
Kelimpah enggau nya mega, iya deka nyukung nengah meri agih belanja ungkup pengawa nya.
Ku iya nambah, simposium tauka licha tu deka ngasuh bala pengajar enggau apai indai ditu nemu enggau silik agi sistem tauka chara kena meransang nembiak meri komitmen dalam pelajar.
Mawan mega madahka sekula ba sitak Sarikei patut nyadika sekula di Julau, Pakan chunto laban ba dia semua sekula, pengajar meri kerejasama enggau iya.
“Aku deka meda ba sitak Sarikei, sekula begempung meri idea sereta penemu kena ngubah tikas penyulut nembiak ungkup pemaik bala nembiak sereta aku ngarap penemu tu ulih dikereja dalam timpuh satu ngagai dua bulan tauka paling enda bepun taun nyin ila kena aku nyediaka ungkup belanja.” ku iya.
Sama bisi datai ba pengerami nya, iya nya Pemanca Edward Ladin Sebang, Penghulu Kasa, Yang Dipertua PIBG SK Assun Bedindang Unchit, Kepala Pengajar Churchill Frank Machop, Tuai Rumah sereta raban Gerempung Apai Indai enggau Pengajar (PIBG) SK Assun.