DE JKR dipinta ngena konsep Pelin Pemansang Digital
KUCHING: Injinir Bagi Menua (DE) ba Opis Kereja Raya (JKR) dipinta ngena konsep Pelin Pemansang Digital dalam Portal Pansik Injinir JKR nya empu.
Direktor JKR Sarawak Datu Zuraimi Sabki madah nya seriris enggau pemansang teknologi jeman diatu lalu udah maya iya DE ngena pelin nya.
“Tu pelasar ‘intranet’ ti kuat ngagai DE nyereta ba pengawa injinir bepelasarka data diatu ba renggat keterubah projek ungkup sida.
“Kereban ungkup data disediaka ngagai opis nya dikena ngelanggur keterubah projek pemansang ti silik, nguna pemaik ‘data raya’ injinir GIS ti komprehensif lalu ngangkatka penau model 3D,” ku iya.
Iya madah munyi nya lebuh bejaku ba Pengerami Makai Lemai Aum Injinir Bagi Menua JKR Sarawak Ke-21 ti digulu Menteri Muda Infrastruktur enggau Pemansang Penyangkai, Datuk Julaihi Narawi ditu, malam Hari Empat.
Pekara pemadu beguna ku Zuraimi, sistem nya dikemansang enggau chara dalam nengah runding digital laban era digitalisasyen ke baru udah ngagai JKR lalu mayuh agi automasi disadang deka datai ba timpuh ke semak tu.
Ku iya, DE nya orang ke ngempu enggau ke ngatur aset ti pemadu beguna bendar dalam ‘Kitarat Hayat Aset’.
“Pia mega, renggat keterubah projek tu diatu diberi ngagai DE laban nya ke semak amat enggau peminta rayat,” ku iya.
Iya madah kelimpah ari nya, JKR mega udah bejalaika Transformasyen JKR 2.0 iya nya siti pengawa ke baru dikena ngaga ubah opis semampai baka nya belama.
JKR ku iya, udah ngena Digitalisasyen JKR ti udah dipejalaika berengkah 31 Januari tauntu tadi ke alai nya nyadi opis keterubah di Sarawak ke mujur ngatur ‘Hari Perhimpunan JKR’ ti mungkur 1,655 iku pesereta ari indu opis, opis bagi menua enggau kandang menua seretai dipejalaika nengah ‘online’.
Sentang pemar ti deka ditapi JKR, iya madah sida napi pemar ke jauh agi besai nengah pemisi projek Jalai Besai Pan Borneo, Jalai Pesisir enggau Jalai Besai Kedua ti diserah terus ngagai JKR Sarawak.
Ku iya, projek nya dipelaba beungkus lebih ari RM50 bilion lalu mayuh projek pemansang ke bukai deka diberi ngagai JKR jemah dudi ila nyentuk ba taun 2030.
Zuraimi madah, ba Atur PemansangMalaysiaLumpar Ke-10 (RMK10) enggau RMK11, JKR udah mujur nembuka 968 iti projek pemansang ti beungkus lebih ari RM18 bilion tauka naka RM1.8 bilion ninting taun, iya nya semak dua kali lipat sebedau transforamsyen.
“Maya tu, JKR ngatur projek pemansang beungkus RM43.488 bilion enggau puku rata ba RMK11, lalu dilanjar ngagai RMK12.
“Projek Transformasyen Menua Pesisir ti dipejalaika DE udah nyapai RM695 juta enti nitih puku rata ungkus projek sekumbang lima taun ke udah,” ku iya.