IEW sekali agi deka diatur kena 6-8 Oktober 2020
KUCHING: Opis Menteri Utiliti sekali agi deka ngatur program Minggu Tenaga Antarabangsa (IEW) kena 6 ngagai 8 Oktober 2020 ba Palan Konvensyen Borneo Kuching (BCCK) ditu.
Manggai edisyen kelima taun baru, IEW nya program aum enggau pengawa pemandang pengereja antarabansa pemadu besai di Malaysia Timur ti mungkur mayuh bengkah menua kelimpah Malaysia.
Menteri Utiliti, Dato Sri Dr Stephen Rundi Utom madah ngena rambai jaku ‘Energy Growth for Economic Transformation in Digitalization Age’, IEW 2020 melaba penyereta 150 iku orang ti mandang, 250 delegasyen enggau lebih 5,000 iku temuai.
“Seriris nengah inisiatif Ekonomi Digital Sarawak, mayuh agi pengereja pengawa ke bekaul enggau teknologi digital, isi aplikasyen nyengkaum perambu runding dipelaba dibantai sereta dipandang ba IEW 2020,” ku iya.
Iya madah munyi nya maya pra-ngemunka IEW 2020 lalu ditangkan aum media di Auditorium Menara LCDA ditu kemari.
Dulu agi ari tu, Direktor AMB Tarsus Exhibitions Sdn Bhd, Andrew Siow madah IEW ti deka dipejalaika ila nyengkaum ba pengawa pemandang antarabansa, aum antarabansa, pengawa dagang enggau nemuai ngagai palan projek sereta fasiliti.
Taun ke udah, IEW matak penyereta 144 iku orang ti mandang sereta 4,351 delegasyen nyengkaum temuai ari menua luar baka Brunei, Indonesia, China, India, Filipina, Singapura enggau ke bukai.
Taun baru ku iya, fokus ngagai Indonesia seriris enggau pemansang Kalimantan nengah pemindah indu kota menua nya ngagai kandang menua tu.
IEW 2020 mega deka mandangka penumbuh enggau pemansang Koridor Tenaga Diperbaharui Sarawak (SCORE) ke alai diatu udah tama ba renggat kedua pemansang (2016-2020).
Bisi mega dipandang iya nya projek Jalai Besai Pan Borneo ke ngaul Sarawak, Sabah nengah Brunei.
Bala orang ti mandang ari raban pemekal enggau pengeluar bekal karan, penyedia teknologi enggau servis ungkup elekterik sereta ke bekaul.
Sama bisi datai iya nya, Menteri Muda Elekterik Menua Pesisir, Datuk Liwan Lagang, Menteri Muda Bekal Ai, Datuk Dr Abdul Rahman Junaidi enggau Sekretari Mendam Opis Menteri Utiliti, Dato Ir Alice Jawan.