Semua projek jematan deka digaga nengah tinda tebuka
Tinda tebuka nya setipak enggau pengeran deka nuju penampak enggau atur pengawa ti manah, ku Abang Johari
KUCHING: Semua projek jematan ti digaga sereta dipelanja Perintah Sarawak dipejalaika nengah chara tinda tebuka setipak enggau pengeran deka nuju penampak enggau atur pengawa ti manah.
Kepala Menteri Datuk Patinggi Abang Johari Tun Openg madah dalam pengeran deka bejalaika mayuh projek infrastruktur dalam timpuh dua taun tu, iya madah diri gaga ati laban projek nya benung nganti proses ditinda.
Ku iya, beberapa minggu ke udah projek ngaga jematan Batang Rambungan dipenyadi sereta sebedau nya projek jematan Kuala Kemena enggai Batang Lasa mega udah dipenyadi.
“Enda lama agi deka dipenyadika iya nya jematan batang Saribas, jematan Batang Krian enggau jematan Batang Paloh. Jematan Batang Lupar ti beungkus urung bebilion ringgit mega deka ditinda enda lama agi.
“Jematan tu iya nya sekeda ari putus sambung ari jalai besai tebing tasik ke amat beguna dikena muka peluang ngagai kandang menua tebing tasik lebih agi bekaul enggau pemansut pemakai.
“Semua projek jematan ti berega beberapa bilion ringgit dipejalaika nengah chara tinda tebuka lalu kitai enda nerima pengawa ngulih kediri projek laban kitai deka nuju ngagai penampak enggau atur pengawa ti manah,” ku iya.
Abang Johari ti mega Menteri Wang mansutka pekara nya lebuh bejaku ba pengerami ngintu Hari Perkhidmatan Awam (HPA) Negeri Sarawak 2019 ti diatur ba BCCK ditu, kemari.
Dulu ari nya iya madahka fokus besai perambu belanja tauka Bajet 2020 perintah nengeri iya nya pemansang enggau transformasyen kandang menua pesisir sereta ngungkupka dulit sepenyampau RM6.6 bilion ari penyampau semua bajet ti urung RM9.9 bilion dikena bejalaika mayuh bengkah projek infrastruktur enggau utiliti.
Komiti Koordinasyen enggau Pemansang mega udah ditumbuhka dikena nentuka semua projek ti dikemen
“Semua projek jematan ti berega beberapa bilion ringgit dipejalaika nengah chara tinda tebuka lalu kitai enda nerima pengawa ngulih kediri projek laban kitai deka nuju ngagai penampak enggau atur pengawa ti manah. ”
Datuk Patinggi Abang Johari Tun Openg Kepala Menteri
darka dalam perambu belanja 2020 enggau perambu belanja 2019 dipejalaika sereta deka digaga tembu nitih ke udah ditimpuh, ku iya.
“Integriti kami ngelui nadai makai suap tauka nadai salahguna kuasa laban rayat mega deka ngakim integriti enggau kredibiliti bepelasarka pengulih kami nentuka projek ti disemaya kami dikenatai nitihka anggar enggau timpuh,” ku iya.
Ku iya, pengulih kitai merambu program pemansang enggau bejalaika ekonomi nengah chara bestruktur enggau maju patut nyereminka integriti nyadi pengereja pengawa perintah.
“Pengereja pengawa perintah ukai semina diambi gawa kena ngangatka penuduk tauka semina nganti diasuh aja tang dikearapka mantu perambu enggau bejalaika program pemansang nguntungka rayat.
“Udah tentu, bisi penanggul, teknikal tauka utai bukai deka nyadi maya bejalaika
projek tang kitai enda tau enda landik mutarka penanggul sereta enggau lengkas ngiga jalai ngemetulka,” ku iya.
Dalam jaku pengelalu HPA Negeri Sarawak 2019, Sekretari Perintah Nengeri Datuk Amar Jaul Samion madahka pengereja pengawa perintah suah napi pemar, penusah ngenyit, bejalaika pengawa ngiga enggau nyelamat, nyaga sereta ngangkatka kualiti pengidup rayat.
Jaul madahka HPA iya nya hari ke amat besai reti laban nya basa, kelai terima kasih sereta ke pemadu beguna dikena ngaku kereja ti digaga pengereja pengawa perintah ungkup rayat ninting hari.
“Kami chukup beterima kasih ngagai sida ti meri peneleba enggau pengelandik sida lalu kekadang mega pengidup sida.
“Nya alai pengereja pengawa perintah enda ngira nama pengawa, enda suah pengawa nya mudah dikereja.
Kami pechaya pengereja pengawa perintah ngayanka integiriti, stamina enggau kereja ti enda ngira diri aja, sereta rega ti pemadu beguna baka pintar, bisi tanggungpengawa enggau nadai bechiping maya betapi enggau pengawa ti mar,” ku iya.
Bisi datai ba pengerami nya Menteri Kaunsil Kandang Menua Dato Sri Dr Sim Kui Hian; Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah; Menteri Pelajar, Sains enggau Pansik Teknologi Dato Sri Michael Manyin Jawong; Menteri ba Opis Kepala Menteri Datuk Talib Zulpilip (Integriti & Ombudsman) Datuk Talib Zulpilip; Menteri Utiliti Dato Sri Stephen Rundi Utom; Menteri Perengka Pengangkut Datuk Lim Kim Shin sereta Sekretari Perintah Besai Sarawak Mohd Shahabuddin Omar.