Bantu RM500 diberi ngagai Pengeraja pengawa opis perintah besai Sarawak

KUCHING: Pengeraja pengawa opis perintah besai Sarawak deka nerima bantu duit RM500 ari Perintah Sarawak, urung bulan Jun 2020.

Kepala Menteri Datuk Patinggi Abang Johari Tun Openg madah, nya dikena ngenang sereta meri terima kasih ngagai pengereja pengawa opis perintah besai Sarawak ke udah bejalaika servis enggau manah.

Di nengeri tu, ari urung lebih 120,000 iku semua pengereja pengawa opis perintah iya nya bisi 94,971 iku pengereja pengawa opis perintah besai di Sarawak.

“Aku dipadahka penyampau pengereja pengawa opis perintah besai (di Sarawak) ti tebal agi sida tu gawa nyadi pengajar, pemesai pengerai, polis ke alai sida tu gawa di menua pesisir.

“Nya alai dikena meri terima kasih ngagai servis ke udah diberi sida, aku udah berandau enggau kaban kabinet ke bisi datai, kami udah ngaga pemutus nambahka bantu duit ngagai semua pengereja pengawa opis perintah besai ba Sarawak sepenyampau RM500.

“Berindik ari pekara tu baru aja diputuska sereta tu begunaka timpuh, tu deka dibayar urung bulan Jun taun baru,” ku iya ti mega Menteri Wang.

Abang Johari mansutka pekara nya beserimbai enggau pengerami ngintu Hari Perkhidmatan Awam (HPA) Negeri Sarawak 2019 ti diatur ba BCCK ditu, kemari.

“Tu dikena nambah ti diberi perintah besai RM500, perintah nengeri nambah RM500, nyadi penyampau semua nya RM1,000,” ku iya.

Nyempulang Abang Johari madahka pasal bantu duit nya kemari, Menteri Kunsil Kandang Menua enggau Pengawa Berumah Dato Sri Dr. Sim Kui Hian; Menteri Pengintu Pengelantang Pendiau,

Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah; Menteri Pelajar, Sains enggau Pansik Teknologi Dato Sri Michael Manyin Jawong; Menteri ba Opis Kepala Menteri Datuk Talib Zulpilip (Integriti & Ombudsman) Datuk Talib Zulpilip; Menteri Utiliti Dato Sri Stephen Rundi Utom; Menteri Perengka Pengangkut Datuk Lim Kim Shin sereta Sekretari Perintah

Nengeri Datuk Amar Jaul Samion enggau Sekretari Perintah Besai Sarawak Mohd Shahabuddin Omar.

Nitihka ripot Bernama sebedau tu, Menteri Wang Lim Guan Eng lebuh mantaika perambu bajet 2020 perintah besai, madahka perintah deka meri bantu khas duit RM500 ngagai pengereja pengawa opis perintah besai berengkah ari Gred 56 enggau ke baruh.

Lalu bantu nya deka diberi sebedau ujung taun 2019.

— Gambar Muhd Rais Sanusi PENYIRU PERINTAH NENGERI: Abang Johari lebuh madahka pasal bantu belanja RM500 ke deka diberi ngagai pengereja pengawa opis perintah besai di Sarawak ba taun baru, seraya disempulang (ari kiba) Dr Sim, Fatimah, Rundi, Jaul sereta (ari kanan) Lim, Shahabuddin enggau Manyin, kemari.