Uggah menang ba saman betenah ngelaban Vernon
KUCHING: Kort Tinggi ditu udah ngaga pemutus ke alai Sapit Kepala Menteri Datuk Amar Douglas Uggah Embas deka nerima bayar ganti rugi RM200,000 ba saman betenah ngelaban Pemesai Khas Menteri Kereja Raya, Vernon Kedit taun siti nyin tadi.
Akim Kort Tinggi Ravinthran N Paramaguru ba prosiding nya ba Kort Tinggi ditu kemari mega minta Vernon, ke di Kuala Lumpur, mayar ungkus luyar RM40,000.
Iya mega ngemendarka perintah ngenanka Vernon tauka ejen iya tauka orang ti gawa ke iya tauka sesapa ngemansut tauka enggau tuju ngemansutka jaku sebana tauka jaku ke sebarang ke sebaka dikena bejaika Uggah nengah sebarang chara.
Uggah, ke mega nadai ditu ketegal nemuai seraya kereja ke menua tasik, diarika luyar iya Sim Hui Chuang, lalu Vernon diarika kuyar iya Desmond Kho.
Prosiding dipejalaika ba balai akim ke mega bilik kort ti dipendingka semua.
Prosiding nya dipejalaika pengelama urung sejam sebedau akim ngaga pemutus.
“Kebendar iya akim ngemendarka utai ti dituntut plaintif lalu nemu defendan endang patut bisi tanggung pengawa ba pekara nya, lalu minta defendan mayar ganti rugi RM200,000 enggau ungkus luyar RM40,000, sereta mega nangkup perintah ke diberi ngagai klien aku,” ku Sim madah ngagai pengarang berita pengudah prosiding nya.
Ngarika Uggah, Sapit Sekretari Besai PBB Datuk Ibrahim Baki madah ngagai pengarang berita pengudah ngenukuka pemutus penerang ari Sim sereta deka ngenataika berita nya ngagai Uggah.
Berebak enggau nya, Kho madahka klien iya Vernon di Kuala Lumpur bejalaika pengawa iya nyadi Pemesai
Khas Menteri Kereja Raya, Baru Bian.
“Aku deka nanya klien aku sekalika deka ngapil laban ba tetiap pemutus kort tinggi endang tau ngapil. Pemutus nya mesti digaga klien aku, lalu enda tau ngaga nya ngarika iya,” ku Kho.
Uggah udah nyaman Vernon ketegal ngumbai iya “bula” sereta “traitor”, ke alai Uggah madahka nya petenah ti berat ti dikeluar sereta dikerembai nengah WhatsApp randau raban ‘Media PKR Nengeri Sarawak ’ ujung taun siti nyin tadi.
Vernon nyebut munyi nya lebuh ti ngenang pasal pengurang ba ubah Undang – Undang Tanah Sarawak,kelebih agi ba sentang chara nukar tanah Hak Adat Bumiputera (NCR) ngagai Native Territorial Domain (NTD).
Vernon madahka Uggah “bula” lebuh nerangka reti hak ‘usufructuary’ ke alai nadai siku pan tayu ngempu sereta ngena, ngujungka Uggah amat ngenggaika nya.