Pemeri ngenyit bantu duit RM500 ari perintah Sarawak diterima manah
KUCHING: Pemeri ngenyit bantu duit RM500 ari Perintah Sarawak ngagai pengereja pengawa perintah besai di nengeri tu negu ati sida.
Direktor Opis Bomba enggau Penyelamat Malaysia (JBPM) Sarawak Khirudin Drahman madah, nya ngayanka Perintah Sarawak nengah iring Kepala Menteri Datuk Patinggi Abang Johari Tun Openg ngaku, siru sereta chukup gaga ati enggau pengereja pengawa perintah besai ti meri servis di nengeri tu.
Ku iya, raban JBPM Sarawak udah bejalaika pengawa sereta enda ngira maya meri servis ti manah ngagai raban bansa di nengeri Sarawak.
“Kami (JBPM Sarawak) nyambut manah lalu meri terima kasih ngagai pemeri ngenyit tadi (kemari)lalu aku ngasaika tu engka pengasih iya (Abang Johari) ngagai pengereja pengawa perintah ti meri servis ngagai rayat nengeri Sarawak.
“Sarawak, kami (JBPM) bisi urung 1,206 iku lalu aku ngarika sida iya meri terima kasih sereta ngarapka pemeri tu deka ulih meri peransang ngagai raban ba pengawa meri servis ti lebih manah ngagai raban bansa.
“Ari ati aku empu aku meri terima kasih enggau chukup gaga ati enggau tu,” ku iya lebuh dikerandau pengudah ti ngulu pengerami ‘Hari Perkhidmatan Awam (HPS) Negeri Sarawak 2019’ ba BCCK ditu, kemari.
Iya m adah munyi nya lebuh dipinta ngenang pekara ti dipadah Kepala Menteri Datuk Patinggi Abang Johari Tun Openg ba pengerami HPA Negeri Sarawak 2019 iya nya pengereja pengawa opis perintah besai di Sarawak, ti deka nerima bantu duit RM500 ti diberi dalam urung bulan Jun 2020.
Kelimpah ari nya, Ketuai Polis Pelilih Menua Sibu ACP Stanley Jonathan Ringgit lebuh dipinta ngenang pekara ti dibantaika Abang Johari, iya beterima kasih ngagai perintah nengeri ti penyiru ngagai pengereja pengawa perintah nyengkaum pengereja pengawa perintah besai di Sarawak.
Stanley madah bantu duit RM500 nya insentif lebih ngagai ke pengereja pengawa perintah ti gawa di menua pesisir nengeri tu. “Tu siti insentif ngagai kami ti gawa di nengeri Sarawak kelebih agi ungkup ke gawa jauh di menua pesisir.
“(Laban) tebal agi sida ti gawa di menua pesisir tu mega pengereja pengawa perintah besai. Nya alai terima kasih ngagai Perintah Sarawak,” ku iya lebuh dikerandau pengudah ngulu HPA Negeri Sarawak 2019, kemari.