Terima kasih ke penyiru perintah Sarawak: CNS
Pemeri RM500 ungkup pengereja pengawa perintah besai ngelaika perintah nengeri mendingka sada sida
KUCHING: Perintah Sarawak siru enggau pengawa ti dikereja pengereja pengawa perintah besai ke sama mantu bejalaika polisi pemansang di nengeri tu.
Chairman CNS Ahmad Malie madahka perintah nengeri tu mega mending sereta beratka sada pengereja pengawa perintah nengah Cuepacs Nengeri Sarawak (CNS).
“CNS meri puji sereta terima kasih mayuh ngagai YAB Kepala Menteri Datuk Patinggi Abang Johari Tun Openg laban ti udah madah deka meri bantu duit sepenyampau RM500 ngagai semua pengereja pengawa perintah besai di Sarawak.
“Pekara ti dipadahka YAB Kepala Menteri mandangka Perintah Sarawak ari baruh iring Datuk Patinggi Abang Johari chukup beratka sada pengereja pengawa perintah nengah CNS sereta ingatka pengawa ti udah dikereja pengereja pengawa perintah besai ti sama mantu bejalaika polisi pemansang di nengeri tu,” ku iya madah ngagai Utusan Borneo, kemari.
Ahmad ti mega Presiden Kesatuan Guru Bumiputera Sarawak meri penerang nya bekaul enggau pekara ti dipadahka Kepala Menteri Datuk Patinggi Abang Johari Tun Openg, beserimbai enggau pengerami ngintu Hari Perkhimdtan Awam (HPA) Negeri Sarawak 2019 kemari, ti madahka pengereja pengawa perintah besai di Sarawak deka nerima bantu duit RM500 ti diberi dalam urung bulan Jun 2020.
Berindik ari pekara nya, CNS ngarapka pengereja pengawa perintah ulih merambu chara ngena duit nya enggau betul, kelebih agi dalam kitai deka ngintu pengerami Gawai Dayak enggau Hari Raya taun baru.
“Enggau pekara ti dipadahka kepala menteri tu mega CNS arap bendar semangat pengereja pengawa perintah deka terus meri servis ti nyulut sereta tinggi ke pemanah semua lebih agi ba peringkat rayat di nengeri tu,” ku iya.
Kelimpah ari bantu duit
RM500 nya, Abang Johari ba pengerami nya mega bisi nyebut diri betemu enggau kaban Cuepacs lalu raban nya deka ke palan genturung pendiau khas ungkup pengereja pengawa perintah.
“Perintah diatu benung mansik alai numbuhka palan genturung pendiau ti stratgik sereta berega murah ungkup pengereja pengawa perintah,” ku Abang Johari nyebut nya maya bejaku ba pengerami ngintu HPA Ngeri Sarawak 2019 di BCCK ditu, kemari.
“
CNS meri puji sereta terima kasih mayuh ngagai YAB Kepala Menteri Datuk Patinggi Abang Johari Tun Openg laban ti udah madah deka meri bantu duit sepenyampau RM500 ngagai semua pengereja pengawa perintah
” besai di Sarawak.
Ahmad Malie
Chairman Cuepacs Nengeri Sarawak