BMC Miri nyungkak industri dagang temuai pengawa berubat
Penumbuh BMC keterubah di utara Sarawak ti disikap enggau perengkaguna moden ulih matak mayuh temuai datai
MIRI: Penumbuh sebuah agi sepital berubat peribit di nengeri tu, Borneo Medical Centre (BMC), ti keempat, deka ngenegapka agi industri dagang temuai bepelasarka pengawa berubat di Sarawak enggau Miri kelebih agi.
Kepala Menteri, Datuk Patinggi Abang Johari Tun Openg pechaya enggau pemisi BMC ti disikap enggau perengkaguna ti moden enggau chukup, Misi sereta Sarawak kelebih agi, ulih nyadi baka Singapura ti nyadi palan ke suah dilawa dalam sektor dagang temuai ti bepelasarka pengawa berubat.
“Nyema kita mansik nama kebuah Singapura ulih nyulut dalam industri tu, laban sida nyendiaka servis berubat enggau pengerai ti endang tebilang sereta moden,” ku iya.
Nya alai, ku iya, lapa mayuh orang deka ke Singapura dikena mansik enggau silik (penyakit sereta pengerai sida) laban fasiliti ti baru sereta moden.
“Nya mega ulih dikemansang di Sarawak. Nyema kitai ulih nyendiaka nya (servis berubat enggau perengka berubat ti chukup enggau moden), nya alai kitai mega ulih nyadi baka Singapura,” ku iya nambah.
Iya madah munyi nya lebuh ti bejaku maya bejadi pengerami ngemunka BMC Miri ditu kilah ensanus.
BMC Miri iya nya sepital peribit keterubah ti dikemansangka Borneo Specialist Hospital Sdn Bhd di Miri sereta ba kandang menua
Nyema kita mansik nama kebuah Singapura ulih nyulut dalam industri tu, laban sida nyendiaka servis berubat enggau pengerai ti endang tebilang sereta moden.
Datuk Patinggi Abang Johari Tun Openg
Kepala Menteri
utara Sarawak sereta ti keempat di nengeri tu, sepengudah Rejang Medical Centre ba Sibu ti ditumbuh 22 taun ke udah, ditangkanka BMC ba Bintulu kena taun 2011 lalu ba Kuching ba taun 2013.
“Berindik ari nya aku deka meri besai pengaga ati ke inisiatif BMC dalam pengeransing sida numbuhka sepital tu ba kandang menua utara nengeri tu lalu nya mega deka mantu ngelaku sereta ngenegapka industri dagang temuai ti bepelasarka pengawa berubat di nengeri tu,” ku iya.
“Aku udah ngelawa sekeda sepital lalu naka ke diatu, sepital tu (BMC Miri) nya ti pemaduh manah ari sukut pelin sereta struktur begunan,” ku iya nambah.
Dalam aum media, ti diatur pengudah nya, Abang Johari madahka perintah nengeri Sarawak endang optimis enggau tikas pengulih sektor peribit dalam ngemansang sereta nyendiaka servis berubat enggau pengerai di nengeri tu.
Abang Johari madahka iya pechaya agi sektor peribit dalam nyendiaka servis nyaga rayat, lalu ditambah enggau pengulih sida nyendiaka perengkaguna ti chukup enggau moden agi ti ulih besemekih enggau menua luar.
“Kelimpah ari nya sektor peribit mega ulih ngaga pelin begunan enggau perengkaguna peneka ati sida enti dibanding enggau perintah ti meseti nitihka pelin ari Opis Kereja Raya (JKR), ke ngembaun pelin begunan ti biasa lalu sama aja sereta enda 'update',” ku iya nandu.
Berindik ari pengandal nya, ku iya, perintah deka seruran bekerejasama enggau mantu sektor peribit enggau pengawa mansik sereta nyendiaka taba ti engkeman.
Beserimbai enggau nya, iya mega pechaya nengah pemisi BMC Miri ukai semina nambahka pilih ungkup perengkaguna berubat ngagai peranak di kandang menua tu enggau utara nengeri kelebih agi, tang mega ngagai peranak di menua ti berimbai enggau kitai.
Lebuh ti ditanya bekaul servis nyaga pengerai kelebih agi ungkup orang lunggar umur di nengeri tu, Abang Johari madahka sektor peribit nyendiaka servis nyaga ti manah agi enti dibanding enggau perintah.
Ku iya, enggau pemayuh orang lunggar umur ti majak nambah diatu, palan nyaga ulih dikemansang enggau perengkaguna ti manah, baka konsep ke dikena ba Australia, iya nya rumah nyaga ungkup orang siku, ti disikap enggau mayuh macham perengkaguna.
Abang Johari madahka palan nyaga ti dikemansang di Tabuan, Kuching ti endang chukup mujur lalu ba Miri, BMC merambu deka ngemansangka palan nyaga ti sebaka ba taba ti puang besepiak enggau sepital nya.
Sama datai ba pngerami nya Menteri Kaunsil Kandang Menua enggau Pengawa Berumah Prof Dato' Sri Dr Sik Kui Hian, Menteri Perengka Pengangkut Datuk Lee Kim Shin, kededua Direktor Pengatur BMC Dr Peter Tang enggau Robert Lau, Chairman BMC Miri Dr Matthew Kho, Direktor Perubat BMC Miri Dr Kenny Yeap sereta bala menteri muda enggau pengari rayat di kandang menua tu.