Jamit udah nemuai seraya begulai enggau rayat ba Kampung Kemarau
KAPIT: Kaban Kunsil Nengeri (ADUN) Bukit Goram, Jefferson Jamit Unyat apin lama ti udah nemuai ngagai Kampung Kemarau, Jalai Puan Sri Tiong ti ba Ulu Sungai Selirik ditu.
Kelimpah ari betemu enggau rayat. Program iya mega iya nya laban ti deka ngelawa sereta matau projek ngaga rumah ti diempu Mambo Anak Penghulu, indai Olivia Chong.
Sekeda kenang bekaul enggau Mambo tu iya nya indai Olivia CHong ke udah bulih midul emas dalam pekit Silat ba SUKMA bedau lama. Olivia pengudah ti nembuka peresa STPM ba Sekula Sekondari (SMK) Kapit, iya lalu nyadi jurulatih silat ari baruh pegai Gerempung Silat HElang Putih Kapit. Diatu, iya udah mujur bulih pengawa nyadi polis.
Laki Mambo ti dikangau enggau nama Chong udah mati pun taun tu tadi bedau lama ti udah ditemu bisi penyakit ti balat. Semanjai taun tu, sida sebilik udah nyuwa rumah kayu ba Jalai Airport.
Maya Olivia bulih midul emas ba SUKMA, iya udah narit pengandal bala pengari rayat di sitak nya ti betuaika Sapit Kepala Menteri Tan Sri Datuk Amar Dr James Jemut Masing, Kaban Kunsil Nengeri (ADUN) Pelagus Wilson Nyabong Ijang sereta
ADUN Bukit Goram Jefferson Jamit Unyat ti udah ngabas sida sebilik ba rumah suwa nya. Maya nya, Olivia udah nerima insentif ari Masing, Nyabong enggau Jamit.
Berindik ari penemuai nya, sida dipeda nadai ngembuan palan pengentap pendiau kediri lalu ari penyiru Masing uda meri bantu ngagai sida sebilik (Chong) sereta mega udah bulih palan endur berumah iya nya ba TOL (Temporary Occupation Land) ba Skim Berumah Baru Kampung Kemarau dikena ngaga rumah sida empu.
Sama bisi datai ngulu pengawa nya Kunsilor Liew Hui Hua, Pengulu Sia Shui Poh sereta bala bukai.
Sepengudah pengawa matau projek nya, dikena nyadika kelai penyiru sereta meri basa ngagai penyulut Olivia dalam pengawa lumba enggau main ti udah menggi midul emas ke tim Sarawak, Jamit mega bisi mantu Mambo ari sukut kereban dikena berumah dikena ngelempungka tating penusah iya.