Empat jalai alun di Tamin deka dikemanah ngena geran RTP
SIBU: Kaban Kunsil Nengeri (ADUN) Tamin Ir Christopher Gira Sambang madahka pengawa ngemanahka empat jalai alun iya nya projek di baruh Program Transformasyen Menua Pesisir (RTP) 2019 DUN Tamin deka berengkah dipejalaika enda lama agi.
Gira madah, tiga ari projek nya nyengkaum pengawa kereja nyeruri sereta ngemanahka bekau jalai lama balak iya nya ari Nanga Sekuau ngagai Sekula Primari (SK) Pakoh, Ulu Oya, ari SK Pakoh ke Rumah (Rh) Undin, Rh Anthony enggau Rh Johnny, Batang Oya sereta Rh Ganya ke Rh Sumping Ulu Oya.
Siti agi projek iya nya, ngemansangka Jalan Ulu Selangau (Rh Lingkok ngagai Rh Tegong), renggat ti kedua.
“Jalai balak nya udah enda diguna sida kompeni balak agi, taja pia nya agi mengkang ditengah sereta nyadika pun jalai peranak rumah panjai ba kandang menua nya.
“Skop kereja ke diatur ba projek tu iya nya nukar jalai tanah ngagai jalai batu, ngaga engkelebat enggau begagaka jematan.
“Projek tu dipelabaka tembu dalam timpuh enam bulan,” ku iya madah ngagai pemerita nengah telefon kemari.
Nitihka penemu Gira, ketetiga projek ti ngemansangka jalai balak nya beguna ungkus belanja urung RM860,000.
Berapit enggau nya, ungkup projek pemansang jalai alun Rh Lingkok ngagai Rh Tegong, Ulu Selangau rengat ti kedua begunaka ungkus belanja sepenyampau RM200,000.
Senentang pekara tu, enti semua projek tu udah tembu ila, Gira ngarapka peranak ba kandang menua nya ulih ngasaika pengelantang enggau pengelikun dudi ari ila.
Kebuah pia, rayat ti diau ba kandang menua pesisir endang andalka pemansang infrastruktur ti sebaka enggau di mengeri, lalu ari projek RTP tu mega ulih ngerapitka seraka pemansang kededua kandang menua tu.