Nyabong dipebasa bejadi projek RTP ba Rh Jawa

KAPIT: Kaban Kunsil Nengeri (ADUN) Pelagus, Wilson Nyabong udah nemuai ngagai Rumah Inang ba jalai Sungai Amang, Jalai Selirik ditu bejadi Projek Tranformasyen Menua Pesisir (RTP), bedau lama ti udah.

Lebuh ke nemuai nya, Nyabong dipebasa bejalaika pengawa adat asal Iban iya nya miring enggau nasih tanah alai ngaga parit besai ba belakang Rumah Jawa ke beungkus RM300,000 dikena nentuka projek nya mujur dipejalaika.

Nadai sistem parit ti meruan digaga ba tanah belakang 65 pintu Rumah Jawa (sebedau tu dikelala enggau nama Rumah Achan Inang). Tetiap maya pengudah ujan bangat, ai ujan ngamahka belakang rumah sereta ngasuh utai temera.

Projek tu dipejalaika dikena maras sereta ngerata tingkah tanah alai ngaga parit besai ke pemanjai 1.5 meter dalam enggau 1.2 pemesai meter ti dipelabaka tembu digaga dalam timpuh enam bulan.

Pengawa nya deka berengkah dalam bulan Disember 2019 tu.

Dulu ari nya lebuh ke datai dia, Nyabong dikelalu ngena adar asal Iban.

Pemesai Opis Pelilih Menua Kapit Cerisologo Sabut, pemesai pengereja pengawa Nyabong, Wallance Hitler, Penghulu Daniel Dian, enggau ke bukaisama bisi nyempulang Nyabong nemuai ngagai Rumah Jawa maya nya.

Muak ke lemai, Nyabong ngulu pengawa begempuru ba ruai rumah panjai nya.

Lebuh ke bejaku, Nyabong nerangka senentang gaya politik ke diatu tu sereta mega sentang inisiatif baru dikena nyukat tanah Hak Adat Bumiputera (NCR).

Iya mega bisi ngungkup belanja sepenyampau RM20,000.00 nengah Projek Mit Pemansang Menua Pesisir (MRP) ngagai Komiti Pemansang enggau Pengelikun Genturung Pendiau (JKKK) ba Rumah Jawa ke diterima Tuai Rumah Jawa empu.