Pemeresi kandang endur patut dijaga dikena nyeliahka penyakit Denggi

SRI AMAN: Pemeresi palan berumah, rumah panjai sereta genturung pendiau patut dijaga ngambika enda nyadi palan nyamuk betelu kelebih agi nyamuk Aedes ti mai penyakit Denggi.

Menteri Muda Pengelantang Komuniti Sarawak Datuk Francis Harden Hollis madah, tu siti ari tanggungpengawa Komiti Pemansang enggau Pengelikun Genturung Pendiau (JKKK) ba tetiap palan endur diau, rumah panjai enggau genturung pendiau dikena nentuka palan endur diau sida semampai likun sereta diseliah ari macham bengkah penyakit.

"Enti palan diau kita kamah,pekara tu ngujungka mayuh bengkah penyakit baka Denggi, taun, tabin kepialu sereta penyakit ke bukai pia mega meri penusah ngagai sida ti diau dia," ku iya.

" Sebedau penyakit tu ngeruga pengidup kitai, aku ngelalau Komiti Pemansang enggau Pengelikun Genturung Pendiau (JKKK) ba tetiap kandang menua di pelilh menua tu ngatur program pengawa beripai sekali dalam kandang sebulan," ku iya ke mega Kaban Kunsil Nengeri (ADUN) Simanggang ti madah munyi nya lebuh bejaku ba pengerami nutup Program 3R (Reduce, Reuse, Ricycle) ti diatur Opis Kaunsil Pelilih

Menua Sri Aman (MDSA) Seksyen Pemansang Komuniti ba Rumah Riti Ganja, Empadi Bati Anchau, Batu Lintang Undop ditu, bedau lama ti udah.

Ku iya, pengawa beripai ti diatur patut mungkur kereja meresi kandang endur iya nya baka nebas rumput, nentuka arus ai enda betakung ba parit ti sumbat, ngumpul uras sereta pekara ke bukai.

"Palan ti enda diberesi deka nyadi palan nyamuk Aedes betelu," ku iya lalu nambah iya nya JKKK patut ngambi inisiatif kediri sereta enda bepanggai ngagai raban MDSA senentang ngatur pengawa beripai.

Kelimpah enggau nya, Harden nyemetak madah iya nya pegawa beripai enda patut digaga nitihka musim tang pengawa tu patut seruran dipejalai, ukai semina beserimbai enggau pengerami aja.

"Enti palan kitai enda beresi, tu ngayanka ulah sida enda ngembuan tanggungpengawa sereta enda beratika enggau pemeresi ba kandang menua nya," ku iya.

Ku iya agi, iya pechaya, nengah kimpin pengawa meresi ti dipejalaika ari raban opis kaunsil, opis pengerai enggau ejensi perintah sereta peribit, mayuh peranak ba kandang nya diatu nemu senentang penyakit ti ngenusahka baka tabin Denggi," ku iya nambah.

"Berita bekaul enggau kimpin pemeresi nengah media penabur mega nyungkal pemereti ati ngagai peranak ba kandang nya senentang beguna amat nyaga pemeresi palan endur diau kitai," ku iya nyemetak agi.

Sama bisi datai ba pengerami nya, Ketuai Kunsil MDSA Anthony Abell Chendan.

Ba pengerami nya, Harden udahngemendarkaagihbelanja Projek Mit Pemansang Menua

Pesisir (MRP) sepenyampau RM3,000 bagi taun 2020 ngagai Komiti Pemansang enggau Pengelikun Genturung Pendiau (JKKK) sereta ngungkup sepenyampau RM2,000 ngagai Biro Orang Indu rumah panjai tu.

Berindik enggau nya, bisi ejensi raban perambu MDSA ti datai meri licha sereta meri servis baka Opis Pengerara Api enggau Penyah Penusah (Bomba), Ejensi Anti-Dadah Kebangsaan (ADDK), Opis Pengerai Bagi Menua Sri Aman, Klinik Pengawa Gigi Bagi Menua Sri Aman beserimbai enggau program nya.