Dikena ngenegapka integriti dalam komuniti di nengeri tu, unit integriti udah ditumbuh ba tetiap ejensi perintah
BINTULU: Perintah Sarawak bebendar deka ngangkatka integriti lalu terus ngemeranka ulah nya dalam ejensi perintah sereta rayat di nengeri tu dikena nentuka rayat nengeri tu ulih nyapai pemansang enggau manah agi.
Kepala Menteri Datuk Patiggi Abang Johari Tun Openg madah, dalam pekara nya perintah nengeri deka terus matau sereta numbuhka unit integriti ba tetiap ejensi sereta deka nentu ngambika semua pemesai ti ngembuan ulah ti manah diberi tanggungpengawa bekaul enggau pengawa ngatur, integriti enggau nadai ngaul diri enggau penyalah makai suap.
Ku iya, waran tiga pangku pengawa ungkup unit integriti udah dianjung ngagai tetiap ejensi lalu iya ngarapka unit nya ditumbuh ti nyadi siti singkang dalam munaska pengawa ti enda manah.
“Kitai deka terus ngadaka mayuh agi pemesai integriti enggau sistem ngatur pengawa ti manah jemah ila laban pekara tu endang berat ti mekuh ngagai ngereja pengawa ti enda bebagi, lurus, ulih nembuka pengawa sereta semua pekara bukai.
“Nya alai bisi ditumbuh Opis Menteri Integriti enggau Ombudsman ti dipegai Datuk Talib (Zulpilip) laban aku endang bebendar deka bekerejasama enggau palan latih (bala pemesai) laban sida mega ati mamai. Nyema pekara nya (integriti) udah bisi, idup kitai deka lantang senang,” ku iya ba pengerami bejadi Forum Kelestarian Integriti sereta nutup Program Pegawai Integriti Bertauliah (CeIO)Siri 23 Bil 3 Taun 2019 ba Hotel Parkcity Everly ditu kemari.
Ku iya, gaya idup ti korup ukai semina bekaul enggau duit tang mega chara berunding ti beguna semua komuniti pupu bansa enggau jalai pengarap di nengeri tu, nya alai bisi mega ditumbuhka unit khas jalai pengarap bukai di Sarawak.
Ku iya madah, integriti tu mega siti ari pekara ti meri empas ke manah ngagai staf perintah bejalaika pengawa sereta chara meri servis ti efektif ngagai komuniti.
Nya alai iya meri terima kasih ngagai Talib enggau bala kaban iya ti udah bejalaika tanggungpengawa ti udah dilempaika dikena sama meri pemereti ati ngagai komuniti bekaul pemerat pemanah ulah ti ngembuan elemen integriti lebuh ti bejalaika pengawa.
“Aku mega beterima kasih ngagai Opis Nagang Penyalah Makai Suap Malaysia (SPRM) ti meri input bakani chara bejalaika pengawa tu lalu pia mega akademi ti mayuh meri latih ngagai 94 pemesai di Sarawak,” ku iya.
Iya madah, latih ti diberi ngagai pemesai endang engkeman laban pemesai nya ti deka diengkah ba sekeda opis menteri enggau ejensi perintah ngambika sama bela ulih matau bekaul prosedur, pekara undang-undang sereta Prosedur Operasyen Standard (SOP) lebuh ti bejalaika tanggungpengawa ti diberi ngagai ejensi perintah.
“Lebuh aku ngambi tanggungpengawa nyadi Kepala Menteri, aku udah numbuhka unit khas ari baruh Opis Kepala Menteri ti betuaika siku menteri (tuju nya) dikena mantu meri sistem mai penerang ti tebuka agi enggau lurus dalam bejalaika pemansang nengeri tu,” ku iya.
Nitih ku iya, nengeri enggau menua ti ngembuan tikas penyulut ke tinggi sereta penyalah makai suap ti mimit iya nya menua ke paling mansang entara nya Denmark enggau gaya penatai pemisi ti tegap lalu rayat ti endang ransing bekereja, lalu Singapura ari sukut tikas penyulut ti nentuka menua tu endang mansang.
“Alhamdulilah nengeri Sarawak lantang, ulah sereta runding komuniti ditu agi manah lalu kitai ulih bejalaika tanggungpengawa enggau manah dikena mai pemansang lalu rayat ulih bulih jereki
lebih seraya ulih nangkup tanggungpengawa ngagai anak, ruang bilik sereta menua,” ku iya.
Beserimbai enggau nya, iya nandu madahka pengawa perintah nengeri deka terus ngemansngka Bintulu enggau nyendiaka perengkaguna Jematan Kuala Kemena ke Jepak ti diatu benung ba pengawa ngaga, ngemansangka Jepak lalu nyendiaka kandang endur berumah dikena nyemelaka rega rumah ti embar di bagi menua tu.
Sama bisi datai Menteri di Opis Kepala Menteri (Integriti enggau Ombudsman) ti mega Kaban Kunsil Nengeri (ADUN) Jepak Datuk Talib Zulpilip, Sapit Sekretari Perintah Nengeri Sarawak (Transformasyen Menua Pesisir) Datu Ik Pahon Joyik, Sapit Ketuai Penerit Adat (Pengatur, Profesionalisme) SPRM Datuk Ja’afar Mahad, Direktor Akademi Nangang Penyalah Makai Suap Malaysia (MAGA) Datuk Idris Zaharudin, ADUN Samalaju Majang Renggi, ketuai ejensi perintah enggau ketuai komuniti.