Tumbuhka raban pengereja pengawa khas ngemata pengawa nyadung bantu ari ‘Pakej Ransangan’
KUCHING: Raban pengereja pengawa khas patut ditumbuhka Opis Nagang Makai Suap (SPRM) Sarawak, ngambi ngemataka pengawa nyadung bantu ‘Pakej Ransangan’ ari perintah besai enggau Pakej Sarawakku Sayang ari Perintah Sarawak.
Aktivis Sosial Peter John Jaban madah, Sarawak tau meda pengawa ti dipejalaika nengeri Sabah ke alai SPRM udah numbuhka pengereja pengawa khas ngambi ngemataka pengawa meri bantu pemakai RM100 ngagai orang ti balat kena empas laban Atur Nagang Pemindah (PKP) ketegal pendemik Covid-19, ngambika enda salah guna.
“Bedau lama udah Direktor SPRM Sabah, Karunanithy Subbiah madahka SPRM deka numbuhka raban pengereja pengawa khas ngambi ngemataka pengawa nyadung barang ngagai tetiap sitak. Kami ngarapka SPRM Sarawak ngaga pengawa ke sama.
“Tetiap iku rayat Malaysia deka nerima pakej bantu ketegal Covid-19 lalu lebuh bantu nya diberi pengawa nya patut dikemataka. Pengawa nyadung patut nyata, dipejalaika enggau manah sereta efisyen,” ku Peter John ba penerang iya kemari.
Ba maya mayuh rayat Malaysia meri terima kasih ngagai sebarang bantu ba maya penguji ke diatu, Peter John ke mega kaban Orgasnisasyen Raban Sivil Malaysia Timur ngelaban ulah makai suap madah, rayat Malaysia anang enda bejejaga laban tu bekaul enggau penyampau duit ke mayuh ti disadung ngagai sekeda institusyen.
Ku iya, Pakej Ransangan ari perintah besai enggau nengeri nya bilion ringgit lalu tau endar nyadi ulah makai suap enggau salah guna.
“Tu tepulai ngagai kitai ke nyadi rayat nentuka pakej ransangan tu datai ba orang ti amat beguna lalu ukai dilimpang orang ke jai dikena ngayaka diri empu dikena bebelanja ba utai bukai.
“Tu nyengkaum orang ti deka beambi ulih ke pemaik politik diri ari belanja ke disadung ngagai mensia mayuh enggau orang politik ke pintar,” ku iya.
Laban PKP mengkang dipejalaika, iya madahka nya bedau disahka parliman lalu sistem ke ngelama tu siti penyilap laban mayuh ti enda datai.
“Kami ngarapka rayat Malaysia ulih begempung ba maya ke napi pemar tu lalu ukai beambi ulih ke pemaik diri empu aja,” ku iya.