GPS nadai kaul enggau pengawa meri bantu ba Flat Sibu Jaya
SIBU: Perintah Gabungan Parti Rayat Sarawak (GPS) nadai kaul enggau pengawa meri bantu ngagai peranak ba Flat di Sibu Jaya kena Hari Satu, empai lama.
Sapit Chairman Opis Kaunsil Kandang Menua Pesisir Sibu (SRDC) Kunsilor Robert Lau Hui Yew madah, berita ke dibantai ba sebuah portal di media rama Facebook ti madahka GPS enggau SRDC salah guna bantu nya, enda amat.
Ku iya, bantu tu kebendar nya diberi siku ari raban ke gerah jari deka mantu peranak ba flat Sibu Jaya ti napi penusah kurang bekal pemakai enggau belanja ketegal peneritkuasa Atur Nagang Pemindah (PKP).
"Berita ke dibantai sekeda raban ba media rama nya, berita selebubu ngapa laban SRDC semina mantu aja lalu nadai bekaul enggau parti politik.
"Pemutus dikena nyuaka bantu tu ngagai peranak ba flat Sibu mega udah dipadah ngagai raban di Opis Residen ditu," ku Lau ba media rama Facebook iya empu.
Nitihku Lau, iya mega enda ngemendarka sesapa meri jaku tangkan tauka nyadi pengari orang ke meri bantu nya, bejaku bekaul enggau bantu tu.
"Pekara bekaul enggau politik endang enda tau disebut.
"Pengawa nyuaka bantu tu nadai bekaul enggau GPS tauka sebarang pampang parti politik ke bukai. Tu mega ukai program tauka inisiatif ari SRDC, taja pan aku sapit chairman SRDC empu sereta aktif ba Sibu Jaya," ku iya.
Kelimpah ari nya, ku Lau, dalam timpuh PKP tu endang bisi orang begunaka bantu. Nya alai, nengah pengawa bakatu ulih mantu ngelempung tating penusah sida.
Berebak enggau tu, Lau ngarapka mayuh agi raban datai meri bantu ngagai rayat ti bepenatai pemisi baruh, ke lebih agi ba kandang menua pesisir.