DAP udah nganjung nama raban kedua minta bantu bekal pemakai ngagai JKM

KUCHING: Palan Servis DAP Bandar Kuching enggau Stampin nyuaka nama raban kedua peminta bantu bekal pemakai ngagai Opis Pengintu Pengelantang Pendiau Raban Bansa (JKM) Sarawak.

Nitihku Chairman DAP, Sarawak Chong Chieng Jen nama raban kedua ti dianjung ensanus nya peminta ari Kuching, Stampin, Puncak Borneo enggau Petra Jaya.

Raban nya sida ti kena empas ari Atur Nagang Pemindah (PKP) dikena nagang pengelekai COVID-19, ti tebal agi ari ruang bilik ti kurang penatai pemisi enggau gawa begaji hari.

“Tu raban peminta kedua, ti bisi 611 ruang bilik ke mungkur urung 3,000 iku (ti minta bantu bekal pemakai),” ku iya nengah penerang berita.

Nama raban peminta keterubah dianjung kilah ensanus. Ku Chong sebedau tu kaban enggau volunteer DAP bisi udah ngajung barang pemakai ti pemadu beguna ngagai rumah ke rumah tang pekara nya diketuka berindik ari Menteri Ngetanka Menua ti nagang semua gerempung ukai dikuasa perintah nganjung pemakai terus ngagai pintu tiap ruang bilik.

“Kami amat ngarapka JKM deka enggau lengkas nganjung barang pemakai ke pemadu beguna ngagai sida peminta tu.

“Kebuah pia laban tu udah masuk minggu ketiga PKP dipejalaika sereta sida tu nadai nurun gawa dalam timpuh dua minggu lalu tu masuk minggu ketiga nadai gawa.

“Nya alai patut amat kitai mantu sida nyendiaka pemakai ba atas mija sida,” ku iya.

Nambahka nya Chong madahka sida iya deka terus mantu ngerejista nama, endur diau sereta penerang sida ti begunaka servis nya ngambika diserahka ngagai JKM.

“Kami ngarap meri kerejasama maya napi penusah pandemik COVID-19,” ku iya ti mega Kaban Parlimen Stampin.

Pengari DAP ke nganjung surat nama peminta nya ensanus, Julian Tan ti kala nyadi kaban parlimen Stampin sereta disempulang Chairman DAPSY Kuching Daphne Ting, pemantu khas Chong iya nya Michael Kong Feng Nian enggau Sim Kiat Leng sereta Leslie Ting (pemantu Kaban Parlimen Bandar Kuching Dr Kelvin Yii).