Bantu pemakai RM16.4j diagihka perintah nengeri minggu tu
Bantu tu deka diagihka nengah JPB Bagi menua, Pelilih sereta diberi ke isi rumah ti bepenatai pemisi mit
MUKAH: Bantu pemakai sepenyampau RM16.4 juta ari perintah nengeri Sarawak lebuh Atur Nagang Pemindah (PKP) deka diagihka dalam kandang minggu tu.
Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Nembiak Mit Dato Sri Fatimah Abdullah madah, nya deka diagihka nengah Komiti Mutarka Penusah Ngenyit (JPB) Renggat Bagi Menua enggau Pelilih.
“Pengawa ngagihka bantu pemakai nya deka ditentuka Komiti Mutarka Penusah Ngenyit Bagi Menua enggau Pelilih sereta pengari rayat di kandang menua diri empu,” ku iya dalam penerang media sepengudah nyadi chairman Aum Komiti Mutarka Penusah Ngenyit Bagi Menua Mukah kilah ensana ba Bangunan Pentadbiran Baharu ditu.
Nitih ku iya, bantu nya deka diberi ngagai raban enggau isi rumah ti bepenatai pemisi baruh tauka ke enda ngembuan penatai pemisi ti tetap.
Pengawa ngagihka bantu pemakai nya deka ditentuka Komiti Mutarka Penusah Ngenyit Bagi Menua enggau Pelilih sereta pengari rayat di kandang menua diri empu.
Dato Sri Fatimah Abdullah
Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Nembiak Mit
Raban tu, ku iya, iya nya sida ti endang napi penanggul lebuh PKP.
Taja pia, ku iya, chara ngagihka bantu tu tetap nitihka PKP iya nya seruran nyaga seraka sosial.
“Nama ti dikemerat iya nya tetiap ruang bilik nya deka nerima bantu lalu bisi pemakai ba mija makai sida semua,” ku iya nerang.
Bantu pemakai ti diberi iya nya ti dikena besehari-hari baka berau, gula, tepung, minyai enggau nyumai sereta barang bukai ti dipeda patut lalu nitihka komiti ti ngatur ba renggat bagi menua, pelilih tauka pengari rayat ba sitak
sida empu.
Beserimbai enggau nya, bantu ari raban Opis Menteri Dagang Dalam Nengeri enggau Pekara Penguna (KPDNHEP) mega diguna dalam nentuka semua bekal pemakai chukup semanjai timpuh PKP sereta mega musim pengerami hari besai.
“Kami udah nemu bisi 800 palan bebelika barang di selampur nengeri tu dikena nentuka barang sereta bekal pemakai seruran chukup,” ku iya.
Nama ti patut, rayat dipinta nitihka semua atur lebuh PKP tu dipejalai kelimpah seruran nentuka pemeresi rumah.