Utusan Borneo (Sarawak)

Fatimah: Mukah sedia deka muka palan kuarantin nyema diguna

-

MUKAH: Palan kuarantin deka dibuka nyema diguna nitihka pematut ari nama utai ti nyadi kemaya hari tu.

Menteri Pengintu Pengelanta­ng Pendiau, Komuniti, Orang Indu, Ruang Bilik enggau Pemansang Nembiak Mit Dato Sri Fatimah Abdullah madah, palan ti udah ditemu iya lalu engkeman nyadika endur kuarantin iya nya Kem Belia Mukah.

“Raban Opis Menteri Pengerai Malaysia (KKM) udah besedia nyema kitai begunaka palan kuarantin ungkup Bagi Menua Mukah,” ku iya ba aum media sepengudah tembu Aum Komiti Mutarka Penusah Ngenyit Bagi Menua Mukah di Bangungan Pentadbira­n Baharu ditu, kilah ensana.

Naka ke diatu di Mukah agi tejaga ke alai dua kes positif COVID-19 sebedau tu udah dipadahka gerai ari igi penyakit nya.

Kededua nya ari kluster tabligh ba Masjid Seri Petaling, lalu siti agi kes ke agi ditasat (PUI) udah dikuaranti­n 14 hari ba rumah.

Bekaul orang ti enda nitihka Atur Nagang Pemindah (PKP), Mukah nyentukka diatu bisi semilan kes iya nya tujuh di Dalat lalu kebukai di Daro.

Semua kes udah dibai ngagai kort ke alai sida ti kena dawa udah ngaku salah lalu deka dijil pengelama dua bulan.

Tu ngayanka PKP patut dititihka rayat enti sida ti enda nitihka atur tu deka ditinggang ukum ti berat.

Atur ti enda ngasuh ba luar kandang endur tauka rumah berengkah ari pukul 7 lemai nyentukka pukul 7 pagi lalu pia mega pengawa bedagang berengkah ari pukul 8 pagi nyentuk 4 lemai baka palan bebelika barang, perenchit ti dipilih sereta pasar tamu enggau pasar basah.

Bekaul guna sentang sengkabung idung enggau mulut tu, perintah Sarawak udah meli tauka ngaga import sepenyampa­u dua juta sengkabung idung enggau mulut ngagai perintah menua China.

Perintah China mega, ku Fatimah, udah meri bantu barang nya tang penyampau nya enda mayuh.

“Kitai agi nganti dua juta sengkabung idung enggau mulut datai baru ke Sarawak,” ku iya nambah.

LUBOK ANTU: Peranak di kandang menua Engkilili enggau Batang Ai diatu tusah ati sereta irau pengudah nemu Palan Servis Komuniti Kaban Kunsil Nengeri (ADUN) Batang Ai enggau Rumah Rehat Opis Pelilih Menua Mit Engkilili diperambu nyadi palan kuarantin pesakit COVID-19.

Pengirau ati nya amat patut laban mayuh peranak ba di iya nya orang tuai ti berisiko.“Sida mega irau laban mayuh ari peranak ba kandang menua nya orang lunggar umur,” ku Kaban Parlimen (MP) Lubok Antu, Jugah Muyang, ba penerang iya, kemari.

“Kaul komuniti ba kandang, menua nya endang rat enggau pangan diri sereta sebedau krisis COVID-19 nyadi, endur ngelingi nya suah penuh enggau mayuh macham aktiviti sereta pengerami enggau mayuh bengkah aum dipejalaik­a ba balai mensia mayuh.

“Gaya bakatu baka ti nyalahka peranak ba kandang menua nya, sida diukum nengah pemutus nya digaga terus sereta sida nadai nemu nama utai ti kebendar nya nyadi,” ku iya.

“Kami endang ngemeratka pekara pengerai, pengelanta­ng sereta pengelikun peranak ba kandang menua nya sereta empas psikologi ari palan kuarantin nya endang amat besai,” ku iya nambah baru.

Pengawa ngengkahka 20 iku Orang Ti Dipelaba (PUI) enggau Orang Ti

Dikemata (PUS) ba Palan Servis Komuniti Kaban Kunsil Nengeri Batang Ai udah nyadi pengirau ati komuniti rumah panjai ngelingi endur nya beratika palan nya ti nengah jalai penama ke Ulu Sungai enggau palan aktiviti nupi ikan pegung.

Jugah madahka pengawa mutarka penusah ngenyit pengelekai pandemik baka COVID-19 patut dibai ke mija aum nengah ketuai raban bansa, Kaban Kunsil Nengeri sereta Kaban Parlimen ungkup konsensus begulai ngambika ulih ngaga pemutus ti manah ti mungkur semua raban, ulih dijapai nengah aum nya.

“Kitai patut ninga sada ari ketuai raban bansa ti ngarika rayat ba baruh pegai iya ngambika kitai nemu, mereti pemadu besai pemutus ti digaga lalu pemutus nya mega bekait enggau nyawa mensia,” ku iya nambah.

“Aku ke mega Kaban Parlimen Lubok Antu ngansak pemutus ngengkahka Palan Servis Komuniti Kaban Kunsil Nengeri(ADUN) Batang Ai sereta Rumah Rehat Opis Pelilih Menua Mit Engkilili nyadi palan kuarantin patut dibatak baru.

“Tu pengudah meda ari sukut guna perubat, penyampau pekereja ti guna, pengelandi­k ti deka matau palan kuarantin nya endang siti pekara ti ngenusahka ati sereta mar diterima laban kitai bejaku bekaul enggau idup tauka mati,” ku iya nambah baru.

“Nya alai, ba aku ti endang ngemeratka pengelikun sereta pengelanta­ng rayat Lubok Antu, aku nyangkal amat Palan Servis Komuniti Kaban Kunsil Nengeri (ADUN) Batang Ai enggau Rumah Rehat Opis Pelilih Menua Mit Engkilili diperambu nyadika palan ungkup palan kuarantin,” ku Jugah.

Iya ngarap amat ngambika pemutus ti ngengkahka palan kuarantin ba endur nya ulih dibatak baru dikena ngemeranka tikas pengerai sereta pengelanta­ng rayat Lubok Antu ti diatu bedau agi dituntung sebarang pengelekai COVID-19.

“Naka tu kami meri tabi basa sereta beterima kasih ngagai kerejasama ari semua raban ti udah mujur nitihka Atur Nagang Pemindah (PKP) ke berengkah dipejalai ari 18 Mac nyentukka diatu,” ku iya baru.

 ??  ?? BESEDIA: Fatimah (tengah) lebuh ti nyadi chairman aum nya kilah ensana.
BESEDIA: Fatimah (tengah) lebuh ti nyadi chairman aum nya kilah ensana.
 ??  ?? JUGAH
JUGAH

Newspapers in Malay

Newspapers from Malaysia