PKP dikena mutuska rentayan pengelekai virus COVID-19, ku Romeo
SIBU: Sekretari Politik Kepala Menteri Romeo Christopher Tegong minta mensia mayuh mengkang diau di rumah aja sekumbang timpuh Atur Nagang Pemindah (PKP) tu dipejalaika.
Ku Romeo, ngasika atur PKP tu endang beguna bendar dikena mutuska rentayan COVID-19.
"PKP tu dipejalaika ukai dikena ngenusahka pemindah kitai, tang dikena mutuska pengelekai COVID-19, sekalika nuan siku ari raban ba baris luan opis pengerai tauka orang biasa.
"Atur perintah tu ukai semina ulih nyaga diri sebilik ari ti kena rampit COVID-19, tang nengah chara tu mega ulih dikena nagang virus nya ari ke majak ngelekai," ku iya madah ngagai pengarang berita kemari.
Dulu agi ari nya, Romeo bisi datai enggau ngulu program nyuaka bantu ngagai raban Gerija Anglika St John, ditu.
Ku Romeo, PKP dipelaba deka ditampung baru ngagai renggat ke terit agi enti sema bala rayat enda ngemerat sereta ngasika atur nya.
Nambahka tu, ku iya, penentu PKP enggau pemujur pengawa mutuska rentayan virus tu bepanggai penuh enggau pengasi rayat empu.
"Enti sema semua kitai bekerejasama sereta nitihka tetiap atur ke dibantaika perintah, aku pechaya ke kitai ulih ngasaika pengidup baka selama," ku Romeo nambah.
Ambika chunto ba rumah, Romeo ngansak raban apai indai ngambika seruran ngemata sereta nentuka bala anak sida diau dirumah.
"Ari perati aku, mayuh bala anak sida bekedayau ba luar rumah ke lebih agi ba kandang menua Sibu Jaya tu. Nya alai aku minta bala apai indai seruran ngemataka anak sida," ku iya nyemetak.
Berebak enggau nya, urung 60 iku raban gerija (St John) nerima bantu bekal pemakai ari Gerija Anglican St John Sibu Jaya.
Chairman 'Church Building Committee St. John Anglican Church,' Sylvester Candy Pai madahka, batang tuju pengawa meri bantu bekal pemakai nya dikena ngelempungka tating penusah ruang bilik ke lebih agi raban pekereja ke begaji hari, dikena napi pengidup sida semanjai timpuh PKP tu.
"Pemeri tu dikena ngelempungka tating raban gerija, ti napi penusah sekumbang pandemik virus tu nyadi," ku iya.