Bazaar Gawai Dayak: SDNU nyukung pemutus perintah nengeri
Kepala Menteri ba aum media di Miri enda ngemendarka muka Bazaar Gawai Dayak taun tu ketegal pengelekai pandemik COVID-19
KUCHING: Pemutus perintah nengeri enda ngemendarka muka Bazaar Gawai Dayak di nengeri tu taun tu disukung Gerempung Bansa Dayak Sarawak (SDNU).
Presiden SDNU, Tan Sri William Mawan pechaya komuniti Dayak di nengeri tu meretika pemutus nya lalu komuniti Dayak di nengeri tu mega sama bejejaga ari gaya ke diatu ti ditapi dunya lalu pemutus ke digaga perintah nengeri nya endang ketegal pandemik COVID-19.
“Tetiap iku patut beratka (Pandemik COVID-19) lalu pelaba aku komuniti Dayak di nengeri tu enda asa ati enggau penerang nya. Ke beguna amat iya nya tetiap iku patut besaup munaska pandemik nya sereta nitihka atur ari perintah,” ku iya lebuh ke dikerandau kemari.
Mawan ke mega Kaban Kunsil Nengeri Pakan ngarapka raban bansa Dayak liat ati nganti nyentuk ke penanggul pandemik nadai agi.
Tetiap iku patut beratka (Pandemik COVID-19) lalu pelaba aku komuniti Dayak di nengeri tu enda asa ati enggau penerang nya. Ke beguna amat iya nya tetiap iku patut besaup munaska pandemik nya sereta nitihka atur ari perintah.
Tan Sri William Mawan
Presiden Gerempung Bansa Dayak Sarawak (SDNU)
“Kitai bisi maya bukai ngintu sereta ngerami. Ba gaya ke diatu, ukai maya ke engkeman kitai ngatur sebarang pengerami ti berisiko sereta ngemalatka agi gaya ke diatu.
“Ke beguna amat ba kitai diatu kelebih agi raban bansa Dayak iya nya sama nyaup nagang pengelekai virus,” ku iya.
Mawan mega nangkan raban bansa Dayak kelebih agi ti diau di menua pesisir enggau ulu entigis ngambika nemu pemadah ti pemadu baru sentang COVID-19.
Tetiap jaku lalau ari perintah ku iya, beguna amat sereta patut dititih ke pemaik diri enggau ruang bilik sereta orang bukai ke ngelingi.
Kelimpah ari Bazaar Gawai Dayak, perintah nengeri mega nginsil Bazaar Ramadan taun tu di serata Sarawak.
Pemutus nya dipadahka Kepala Menteri Datuk Patinggi Abang Johari Tun Openg ba aum media di Miri, kena Hari Minggu nyin tadi.