BPN: Mensia mayuh bebaris panjai ba BSN Sibu
SIBU: Mensia mayuh bebaris panjai ba Bank Simpanan Nasional (BSN) Pampang Sibu ditu, berindik ari pengawa mayar Bantu Prihatin Nasional (BPN) ke berengkah diatur kemari.
Ari perati pengarang berita, mensia mayuh berengkah bebaris panjai kenyau ari pukul 8 pagi, seraya ke nganti bank nya dibuka entara pukul 9 enggau 10 pagi status diri ba kaunter enggau mesin ngeluarka wang automatik (ATM) bank nya.
Nitihka penerang ari BSN Pampang Sibu, BSN udah ngeluarka notis bekaul enggau proses mayar BPN ba media rama ke lalau mensia mayuh.
Ku sida (raban BSN), mensia mayuh ke bisi ngelawa BSN sehari tu (kemari), dipelabaka enda ulih ngena internet tauka nengah online meresa status BPN sida.
“Taja pia, ungkup raban ke bisi kouta internet diri empu, sida tau meresa kediri ba portal BPN.
“Enti sema sida bulih, sida tau meresa nengah online, pengudah nya tau ngelawa sebarang alai ATM endur mansutka duit,” pia ku staf ari BSN Sibu.
Jessie Atun, 42, siku ari orang ke bisi ngelawa BSN Sibu,madahka diri datai tumu ngagai bank nya laban deka ngerejista kad ATM baru ungkup indai iya.
Ku Jessie, seduai indai iya udah mujur bulih BPN pengudah ti meresa nama nengah online.
Berebak enggau nya, Abdul Halik, 37, madahka diri datai tumu pagi ngambika enda bededat enggau mensia mayuh sereta nganti lama.
“Enti sema aku datai laun, udah tentu lama timpuh aku nganti sereta ngatur pengawa tu, laban mensia chukup mayuh datai ngagai bank sehari tu (kemari),” ku iya.
Berebak enggau tu, BSN mega bisi madah ba penerang sida, madahka pengawa mayar BPN deka diatur dalam dua renggat, iya nya kena bulan April enggau Mei 2020. Ba renggat keterubah, pengawa mayar nengah kredit terus ke akaun deka diatur berenggat berengkah ari 6 April 2020 nyentuk 15 April 2020.
Nangkanka nya ku iya, pengawa ngemansutka duit digaga ba semua ATM rentayan MEOS di semua menua. Penguna enda ibuh mayar chaj RM1 ngeluarka duit entara bank ba semua ATM sekumbang timpuh Atur Nagang Pemindah (PKP) tu dipejalaika.
Kelimpah ari nya, BSN mega ngelalau semua penerima ngambika seruran ngemeranka seraka sosial penyauh satu meter, lalu ngelawa pampang BSN ba maya patut aja.
Ungkup raban penerima ke enda mujur bulih BPN tauka nadai rikod, sida dipinta meresa kriteria penerima ke patut nengah online, tauka ngelawa website Opis Asil Dalam Nengeri (LHDN) (https://www.hasil.gov.my) enggau https://bpn.hasil. gov.my.
“Kami mega ngelalu bala penguna ngambika ngaga transaksyen sida nengah myBSN ngagai orang ke bisi akaun BSN,” pia ku penerang ari staf BSN.