Lima peranak ari Sibu dipinta dikuarantin di Sibu Diocesan Pastoral Centre
SIBU: Urung lima iku peranak ari kandang menua tu dipinta dikuarantin sepengelama 14 hari di Sibu Diocesan Pastoral Centre, ba Jalai Kemuyang.
Residen Bagi Menua Sibu Charles Siaw madah, kelelima sida tu datai ari Kota Kinabalu enggau Labuan nengah jalai darat Miri-Sibu.
“Empat iku ari raban tu udah dianjung ngagai palan kuarantin nya kena Hari Minggu empai lama, lalu siku agi dibai sehari tu (kemari),” ku iya.
Sibu Diocesan Pastoral Centre tu sebuah palan kuarantin COVID-19 kedua dibuka ditu, pengudah Kem Nembiak Kemuyang.
Palan kuarantin tu udah berengkah beoperasyen kenyau ari minggu nyin kemari, sereta muat endur ngengkah 60 iku.
Kena minggu nyin kemari, Sapit Kepala Menteri Datuk Amar Douglas Uggah Embas madahka semua raban temuai ke tama ngagai Sarawak, sekalika nengah jalai darat, langit tauka tasik, patut dikuarantin pengelama 14 hari ba palan kuarantin berengkah 5 April.
Ku iya, tu seriris enggau langgur perintah menua ti ngasuh semua raban temuai ke tama ngagai Kuala Lumpur, mesti dikuarantin pengelama 14 hari.
Sentang pekara bukai, Chairman Opis Kaunsil Mengeri Sibu (SDC) Clarence Ting ngelalau raban orang dagang ngambika enda ngambi peluang bedagang baka selama pengudah Komiti Mutarka Penusah Ngenyit (JPBN) meri pemendar ngagai sekeda kedai beoperasyen dua kali seminggu.
Kena Hari Minggu empai lama, Menteri Dagang Temuai, Seni enggau Main Asal, Datuk Abdul Karim Rahman Hamzah madahka, kedai ‘hardware’, kedai nyual kereban betanam betupi (sum, rachun, pemakai jelu) sereta kedai ke nyual barang/barang ganti (entukar, betanam betupi enggau industri) dikemendarka beoperasyen ninting Hari Dua enggau Hari Empat, ari pukul 7 pagi nyentuk 7 lemai.
“Aku ngarapka raban orang ke bedagang tu nitihka jaku lalau enggau atur ti udah dibantai perintah, dikena ngurangka risiko pengelekai COVID-19 ,” ku Datuk Abdul Karim nengah siti penerang ba media rama Facebook iya empu.