Program Nyuaka Bantu Pemakai sitak Repok masuk hari keempat
SARIKEI: Program Nyuaka Bantu Pemakai ngagai komuniti ti tekeruga ketegal Atur Nagang Pemindah (PKP) berindik ari pengelekai igi penyakit berampit COVID19 di sitak Kunsil Nengeri (DUN) Repok diatu masuk hari keempat.
Kaban Kunsil Nengeri Repok, Dato Sri Huang Tiong Sii madah, pengawa nyadung bantu pemakai tu deka terus dipejalaika ngagai tetiap kandang menua nya dikena nentuka raban nitihka pematut enggau ti begunaka bantu nerima bantu ke diberi.
“Sehari tu (kemari) tim ari Palan Servis N.45 Repok nyadung bantu pemakai ba sitak Selangan, Bulat, Stok, Rusa, Ulu Sarikei, Lasit sereta beberapa buah rumah panjai enggau ngagai peranak ba mengeri nitihka pematut bulih bantu nya.
“Pengawa tu iya nya dikena ngelempungka tating ti ditapi mensia mayuh sekumbang timpuh PKP tu diteritka.
“Nengah peluang tu, kami deka ngansak bala peranak ngambika seruran nitihka PKP enggau diau di rumah sekumbang timpuh atur tu diteritka dikena nyeliah ari dirampit pengelekai COVID19,” ku iya, kemari.
Nitih ku Huang, batang tuju perintah bejalaika PKP tu iya nya dikena nentuka pengelikun enggau pengerai rayat seruran dijaga.
Nya alai, ku iya, mensia mayuh mesti nyaga seraka dalam interaksyen sosial dikena ngurangka risiko dirampit COVID-19.
Berebakenggaunya,Huang mega mantaika penyiru ngagai pemar ti ditapi pekereja rintai mua baka lutur, indu misi, staf perubat ,sereta Polis Diraja Malaysia (PDRM) ti udah bebendar amat bejalaika pengawa nagang pengelekai COVID-19 lalu risiko sida dirampit nya besai amat.
“Nya alai, aku ngarap mensia mayuh ulih nitihka tetiap atur sekumbang PKP tu ngambika gaya tu ulih diputar enggau lengkas.
“Kami mega lantang amat ati sereta meri terima kasih ke penyiru Kepala Menteri Sarawak, Datuk Patinggi Abang Johari Tun Openg ngelancharka Pakej Bantu Khas Sarawakku Sayang kelebih agi ngagai raban B40 di Sarawak dikena ngelempungka tating penusah ti tekeruga ketegal pengelekai COVID-19.
“Kami ti nyadi pengari rayat deka seruran meri sukung enggau kerejasama ngagai ketuai Sarawak dikena nentuka tetiap misyen enggau pengarap mai pengelantang sereta pengelikun Sarawak terus dijaga belama,” ku Huang nyemetak baru.