Staf Klinik Pengerai Kapit puh nyendiaka servis berubat ngagai peranak di menua pesisir
KAPIT: Endang nyadi penguji ke besai ngagai bala staf Klinik Pengerai Kapit ba pengawa nyendiaka servis berubat enggau nyaga pengerai mensia mayuh, ukai semina peranak menua tu aja, tang nyengkaum mega ke diau ba kandang menua ulu entigis bagi menua tu.
Pekara tu mar agi dipejalaika berindik ari empas pandemik Covid-19 ke udah nyadi kemaya hari tu, ti ngansak mensia mayuh ngambi nelebaka diri enggau ‘norma’ ke baru, nyengkaum ngemeranka atur seraka sosial sereta patut ngembuan tikas pemeresi diri ke tinggi.
Nitih ku Direktor Klinik Pengerai Kapit, Dr Farhani Samat, chara ngatur pengawa enggau servis sida endang bepelasarka prosedur operasyen standard (SOP) ti udah ditetapka Opis Menteri Pengerai (KKM), kena mantu ngelandaika draf kes Covid19 ba menua tu.
Kelimpah ari nya ku iya, timpuh operasyen sida mega udah ditusun baru. Ungkup ke diatu, klinik tu beoperasyen ari pukul 8 pagi nyentuk 7 lemai, Hari Satu nyentuk Hari Lima.
“Tu kena nagang mensia mayuh ngambika enda bededat. Ungkup bala ke diau semak enggau palan berubat tu, kami ngelalau sida ngambika datai kitu pengudah pukul 5 lemai, ngambika meri awak ngagai orang ke datai ari rumah panjai ti jauh agi, muak ke pagi.
“Taja pia, diatu kami agi kurang staf lalu tu ngujungka tating pengawa kami nyadi berat agi. Kelimpah ari klinik tu, kami mega bisi 12 buah klinik ke bukai ba menua pesisir ti patut dijaga,” ku Dr Farhani lebuh Sapit Menteri Pengerai II, Datuk Aaron Ago Dagang datai ngabas klinik ditu apin lama ke udah.
Entara klinik menua pesisir ti ari baruh pegai Klinik Pengerai Kapit iya nya ba Sungai Melinau, Sungai Sekeroh, Skim Genturung Pendiau Tunoh, Long Busang, Punan Bah, Nanga Ibau, Nanga Merit, Sungai Bena, Nanga Entawau, Sungai Merirai, Sungai Gaat enggau Nanga Mujong.
Berindik ari tu, raban pemesai ba pengawa berubat (KPM) deka ngelawa klinik menua pesisir tu sebulan sekali, lalu semina ba Long Busang aja sebulan dua kali.
Ku Dr Farhani, tu laban menua nya kelalu jauh dilawa. Ambika chunto, ari Kapit ngagai Long Busang begunaka timpuh pejalai pengelama 9 jam nengah jalai kayu batang enggau ngena perengka pengangkut sungai.
Klinik Pengerai Kapit bisi 93 iku staf, iya nya siku lutur, lapan MO, 10 iku pemantu pengawa berubat (MA), 41 iku indu misi enggau 33 iku bala staf ke bukai.
“Penyampau orang ke sakit majak nambah. Ba taun 2018 enggau 2019 suba, dalam sehari kami mutarka urung 300 nyentuk 400 iku orang ke sakit, tang diatu, kami mutarka urung 500 iku orang ke sakit ninting hari.
“Reti nya, tetiap iku MO, sida deka betemu sereta ngubat entara 60 nyentuk 70 iku orang ke sakit dalam sehari. Nambahka nya, kami diatu patut nentuka mensia mayuh ngemeranka atur SOP,” ku Dr Farhani.
Berebak enggau nya, Dr Farhani bisi madah ngagai Aaron bekaul enggau penanggul ke bukai ti ditapi raban pekereja iya lebuh ngatur orang ke sakit.
“Palan kami ditu enda besai, nyau enda umbas endur penyampau orang ke sakit ti majak nambah. Kerusi ke lama mega patut diganti sereta nambahka sekeda perengkaguna ke bukai,” ku iya.
Kelimpah ari tu, Aaron ke mega Kaban Parlimen Kanowit madahka Opis Menteri Pengerai ngembuan perambu ungkup timpuh ke panjai, ngaga sepital baru ba padang bilun ke lama ditu.
“Nyadi Sapit Menteri Pengerai, aku gawa sereta diasuh Menteri Besai Tan Sri Muhyiddin Yassin meresa perengkaguna enggau nyaga pengerai mensia mayuh, tebal agi ba Sarawak enggau Sabah. Nengah pengawa meri licha, kami ulih nemu gaya sereta chara ke manah agi dikena nyaga pengerai mensia mayuh, kelebih agi peranak di menua pesisir,” ku iya.
Nyempulang Aaron ba program tu, iya nya MP Hulu Rajang Datuk Wilson Ugak Kumbong, Direktor Opis Pengerai Sarawak Dr Chin Zin Hing, Pemesai Pengerai Kapit Dr Hamidi Mohamad enggau Direktor Sepital Kapit Dr Ivan Vun.