Bala MO diatu tau minta ngelanjarka kunterik tauka nyadi staf mendam
SIBU: Semua 79 iku Pemesai Pengawa Berubat (MO) di Malaysia diatu ti diberi kunterik kereja enam bulan, tau ngerejista diri ngelanjarka kunterik tauka minta mendam mangku pengawa sida, ku Chairman Biro Pelajar Parti Sa’Ati Rakyat Sarawak (SUPP) Datuk Ding Kuong Hiing.
Nitihku Ding ke mega Kaban Kunsil Nengeri Meradong, pekara tu siti ari semaya ti dijapai nengah pengawa betemu enggau Serakup Pengawa Berubat Malaysia (MMA) enggau Opis Menteri Pengerai Malaysia (KKM) ba Kuala Lumpur, kena 2 Julai empai lama.
Berindik ari nya ku iya, pekara ti bekaul enggau mekanisme dikena ngelanjarka kunterik tu deka dibantaika KKM ba timpuh ke bukai dudi hari ila.
“MMA udah dijamin KKM, senentang pengawa mutarka pekara tu benung dipejalaika, lalu perambu ari MMA benung diperundingka.
“Kunterik ti dilanjarka tu semina kena mantu raban pemesai pengawa berubat ti bebendar nguji minta nyadi lutur tebangkar, nyengkaum sida ti bekaul enggau KKM,” ku iya lebuh ngulu aum pengarang berita ba Opis Servis SUPP Pampang Dudong ditu, empai lama.
Ku iya nambah, MMA madahka sebarang mekanisme ti dibantaika KKM mesti bepelasarka pekara ti patut ngambika bala lutur ulih ngulu pengawa latih nitihka batang penau sida.
“Pelaba aku, pekara tu deka nyadi pekara kebaru agi dudi hari ila, ke alai semua pemesai pengawa berubat semina ngena kunterik, lalu pangku pengawa mendam semina deka diungkupka ngagai lutur tebangkar enggau perunding ke patut,” ku iya.
Dulu agi ari tu, ku Ding madah ngagai raban apai indai pemesai pengawa berubat ti diberi kunterik enam bulan nengah Biro Pelajar SUPP, udah nganjung surat peminta mensia mayuh ngagai Menteri Besai enggau 222 iku raban Parlimen.
Peminta ke pemadu beguna ti bisi dibantaika dalam surat peminta tu iya nya, minta mendam mangku pengawa tauka 10 taun kunterik ngagai 79 iku pemesai pengawa berubat nya.
“Kami mega minta nikika penyampau gaji ti udah dikembuan bala MO kunterik tu, ari UD41 ngagai UD43.
“Kelimpah ari nya, minta KKM nyengkaumka bala MO kunterik ke bisi juluk ati deka ngulu program tebangkar tauka kus ‘postgraduate’ enggau kunterik ti panjai, tauka program degree skolarsip ti ngujungka sida nyadi tebangkar ba pengawa berubat,” ku Ding.
Taja pia ku iya, Biro Pelajar SUPP berasai asa ati laban nadai ninga sebarang timbal bekaul enggau peminta ke pemadu beguna ti patut diberi ngagai sida, iya nya mindahka MO peranak ari Sarawak enggau Sabah ngagai sepital ba nengeri asal sida.
“Nengah peluang tu, Biro Pelajar SUPP ngansak semua Kaban Parlimen ari Sabah enggau Sarawak nampung peminta tu, seriris enggau ‘Borneonisation’ ti udah ditetapka ari baruh Sempekat Malaysia 1963 (MA63),” ku iya nambah.
Sama bisi ba pengawa tu iya nya Chairman Parti Aa’Ati Rakyat Sarawak (SUPP) Dudong Wong Ching Yong, raban MMA Pampang Sibu Dr Wong Chya Wei, Ketuai Nembiak SUPP Dudong Benjamin Tian enggau Sekretari Politik Kepala Menteri Teng Ung Woo.