Penyampau kes positif COVID-19 di Sarawak nadai berubah: JPBNS

KUCHING: Kes positif COVID-19 di Sarawak mengkang 572 kes, berindik ari ti nadai ngerikodka kes baru, kemari.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita ke sama kemari mega madah, bisi dua baru udah gerai sereta dikemendarka pansut ari sepital.

“Sehari tu (kemari) nadai kes positif COVID-19 diripotka.

“Baka ti dipadah, bisi dua kes baru ke udah gerai sereta dikemendarka pansut ari Sepital Besai Sarawak (1) enggau Sepital Bintulu (1) sehari tu (kemari).

“Tu nyadika penyampau semua kes positif COVID19 ke udah gerai sereta dikemendarka pansut ari sepital bisi 551 iku tauka 96.33 peratus,” ku JPBNS, kemari.

Naka kemari mega, bisi empat iku agi diperubat ba wad isolasyen sepital, kelimpah ari penyampau lesi ketegal COVID-19 agi mengkang 17 iku.

Bisi 58 PUI baru diripotka enggau tujuh kes agi nganti pemutus makmal.

Kemari mega bisi 116 Person Under Surveillance (PUS) udah ngerejista masuk di hotel sereta dikuarantin, ti nyadika penyampau semua PUS ba 11 buah hotel bisi 697 iku. Lalu bisi 17,835 PUS udah abis timpuh kuarantin.

Nambahka nya, semina pelilih menua Kuching agi dalam ketegori Zon Kuning lalu 39 pelilih menua dalam kategori Zon Gadung.

Kelimpah ari nya, bekaul enggau Op Benteng kemari bisi enam pengawa ngempang jalai alun dipejalaika ba lima pelilih menua iya nya di Lundu (2), Bau (1), Serian(1), Sri Aman 91) enggau Lubok Antu (1).

“Ari enam pengawa ngempang jalai alun nya bisi 968 buah perengka pengangkut udah diperesa,” ku JPBNS.