Menara tambah NFCP deka digaga dalam sitak Parlimen Puncak Borneo
KUCHING: Menara Pelan Gentian Optik dan Kesalinghubungan Negara (NFCP) deka digaga ba kandang endur baru dalam sitak Parlimen Puncak Borneo, kena mutarka penanggul sereta nyendiaka arus internet ti lebih meruan.
Kaban Parlimen nya, Willie Mongin madah menara tambah NFCP digaga ba kandang endur baru dalam sitak nya.
“Berita manah iya nya kitai deka ngaga beberapa iti agi menara Pelan Gentian Optik dan Kesalinghubungan Negara (NFCP) ba sitak Parlimen Puncak Borneo.
“Menara tambah NFCP tu deka digaga ba kandang endur baru iya nya Kampung Puak (Bau), Kampung Danu, Skim Penempatan Semula Empangan Bengoh, Kampung Abang, Kampung Kamug, Kampung Maras, Kampung Muk Ayun, Kampung Simpok, Kampung Gayu, Kampung Bunga, Kampung Baru Mawang, Kem Juara enggau Kampung Bisira Rayang.
“Enggau gaga ati aku madahka pengawa nambah menara tu diatu dalam renggat tinda,” ku iya ti mega Sapit Menteri Industri Ladang enggau Komoditi II, nengah penerang berita apin lama.
Iya madah diri beratka pekara nya awakka ulih mantu enggau nyendiaka hak telekomununikasi infrastruktur asas ngagai rayat.
Nitihku iya mega, Perintah Sarawak mega bisi nyendiaka menara tambah dikena mutarka penanggul arus internet di nengeri tu.
“Parlimen Puncak Borneo mega deka bisi projek menara tambah ari baruh Perintah Sarawak iya nya Digitalisation and Tele-communication Initiative sereta Sarawak Multimedia Authority (SMA) diatu benung dalam perambu enggau digaga entara 16 ngagai 19 menara,” ku iya.
Dulu ari nya, iya madah diri enda ngenggaika ba parlimen nya bisi sekeda kandang menua bedau disediaka telekomunikayen.
Sekeda kandang menua udah dibungkur tauka disambung 3G enggau 4D tang bisi mega kandang menua bedau dibekal tauka disambung ngena nya tang semina dibungkur sambung H + enggau signal analog aja, ku iya.
“Aku udah nerima mayuh sebana ti bekaul nyengkaum arus internet ti chukup lubah.
“Tang tu (arus internet lubah) nyadi laban tiap iku orang dalam timpuh Atur Nagang Pemindah (PKP) tebal agi diau ba rumah enggau tauka gawa ari rumah sereta suah meda media sosial enggau ke bukai ti begunaka internet.
“Aku enggau lengkas betemu enggau Direktor SKMM Sarawak sereta raban iya ngambika mutarka isu tauka penanggul nya laban udah ngeruga chara idup raban bansa kitai lebih agi mata PKP, PKPP tu,” ku iya seraya madah diri bebendar deka mutarka penanggul ti bekaul nya.
Parlimen Puncak Borneo bisi enam (6) Pusat internet, 41 Menara USP nyengkaum Smallcell, 43 Menara Upgrade 3G/4G.
Ari 41 Menara USP tu ku iya, bisi tujuh (7) iya nya Very Small Aperture Terminal (VSAT) iya nya sistem komunikasyen sateli, ti bisi disediaka ba Kampung Skio, Kampung Gumbang, Kampung Padang Pan, Sapit Pangkalan 4, Kampung Sg Resit, Kampung Plaman Payang enggau Kampung Sadir, Padawan.
“Bansa tu bepanggai ba gaya hari enggau remang.
“Menara ke bukai bepanggai ngagai transmisyen microwave aja. Transmisi microwave iya nya sebansa kena nganjung pemadah nengah gelumbang radio,” ku iya.