Rolland gaga ati projek ngaga Jematan Meluan ditampung baru
JULAU: Kaban Kunsil Nengeri Meluan, Rolland Duat lantang ati laban kereja ngaga Jematan Meluan udah ditampung baru pengudah tejanggal urung tiga bulan ketegal Atur Nagang Pemindah (PKP) kena mutuska rentayan pandemik COVID-19.
Projek jematan besi ti bepalan semak enggau Kubu Brooke, Nanga Meluan ditu deka nyadi penegap ngagai pemansang sosio-ekonomi semanjai Sungai Kanowit ti besemak enggau tanah ladang peranak rumah panjai ba dia, ku Rolland lebuh ke bejadi pengerami asal bansa ba rumah panjai ba sitak nya apin lama ti udah.
Projek ti diungkupka perintah nengeri sepenyampau RM10 juta nyadi ubah pemansang ukai semina ngagai kandang menua ba seberai Kubu Brooke tang mega ba kandang Ulu Kanowit baka Nanga Maong, Nanga Ju, Ulu Mujok enggau Lijan kelimpah projek jalai alun ti nyambung ke kandang menua nya mega udah dikemendarka, ku Rolland.
Pengudah Jematan Meluan tembu digaga, projek jalai alun ari Nanga Meluan ti nyambung ke Nanga Maong enggau Nanga Ju deka lengkas dipejalaika nengah agih belanja beungkus RM50 juta, ku iya nyadika chunto.
“Projek Jematan Meluan enggau Jalai Alun Ulu Kanowit deka ngemandakka timpuh pejalai ngagai 45 minit enti dibandingke enggau timpuh dua ngagai tiga jam ngena perau, ti nyadi perengka pengangkut ke dikena sida diatu,” ku Rolland.
Kelimpah ari nya, infrastruktur tu deka muka peluang ngaga projek utiliti baka mekalka ai beresi, bekal elekterik, sistem telekomunikasyen enggau ke bukai, ku Rolland nambah.
Projek jematan ke endang dianti ngelama tu udah berengkah dipejalaika nengah pengawa ngerata tanah pun bulan Disember nyin tadi, dipelabaka deka tembu pun bulan Jun taun taun baru.
Ku Rolland, iya gaga ati laban kunteriktor ari EPR Sdn. Bhd udah berengkah nampung ngaga baru projek nya sereta taja bisi tejanggal ketegal COVID-19, iya pechaya ulih nembuka projek nya baka ti udah diperambu.
Rolland mega ngelalau pengempu tanah Hak Adat Bansa Asal (NCR) ba kandang menua nya, ngambi bagi dalam model pemansang tanah NCR nengah Kaunsil Penyerakup enggau Pengintu Tanah Sarawak (Salcra), pengudah infrastruktur pemansang sosio-ekonomi dipejalaika ba kandang menua sida.