Agi mayuh pekara patut digaga kena ngemansangka ekonomi menua pesisir
SARIKEI: Mayuh agi pekara ke patut dipejalaika dikena ngemansangka ekonomi menua pesisir baka ke udah dilanggur enggau dipejalaika ngelama tu dipeda nadai pemujur nyapai tuju nya.
Chairman Malaysia Hope Community (KHM) pampang Bulat, Philip Wong Pak Ming madahka perintah Sarawak udah ungkupka bejuta sereta bebilion ringgit semanjai taun dikena ngemansangka ekonomi menua pesisir kelebih agi dalam sektor betanam betupi, tang pengidup raban pekebun majak enda berubah enti dibanding enggau 10 taun, 20 taun tauka 50 taun ke udah.
“Sida agi idup merinsa enggau mayuh ba baruh garis seranta. Ba penemu aku chara ke patut diambi perintah nengeri kelebih agi Opis Menteri Betanam Betupi Moden,Tanah Adat enggau Pemansang Kandang Menua iya nya mesti bejalaika pengawa ngabas tauka meresa enggau silik.
Madahka nama pengawa ke udah dipejalaika perintah semanjai taun iya nya semua utai ti dipinta raban pekebun diberi nengah geran tauka subsidi betanam betupi ti mimit, iya ngasaika perintah patut ngaga ubah ti radikal ba polisi pemansang tauka ngiga chara ngemansangka menua pesisir, ku Wong.
Tang, meransang bala pekebun ngambi ngerembaika ba dagang sida, iya beratika pemansut subsidi udah meri empas ngagai pekebun ke alai sida ba zon ti likun, ku iya seraya nambah, bereti agi nyema perintah ulih mantu raban pekebun mindah ngagai pengawa betanam betupi moden.
Dalam pekara tu, perintah tau belajar ari menua baka Australia, New Zealand, China, Taiwan, United States sereta mega Thailand ti ngeksport produk betanam betupi ke beungkus bebilion dolar ninting taun, ku iya meri langgur penemu.
Taja pia, menua kitai ngimport pemakai beungkus lebih ari RM60 bilion ninting taun, ku iya.
“Ke ngasuh ati alit iya nya jagung, dagin kambin, daging chapi enggau mega sayur gadung ke ulih tumbuh ba menua tropika nyengkaum dalam rintai barang diimport kitai. Tu mandangka bisi pekara ti enda betul ba sektor betanam betupi kitai.
Iya mega pechaya pekebun kitai nadai pengidup manah jemah ila enti sida mengkang dalam kategori mit sereta ngemeranka chara betanam betupi tradisional.
Ba pengawa betanam betupi moden, pemesai tanah ti engkeman mesti enda kurang ari 10 ikar enggau dikena ngemesaika nyadi 100 ikar nengah teknologi baru.
Sarawak patut nadai penanggul dalam sukut tu laban ngembuan pemesai tanah 12.4 juta hektar enggau 30 juta ikar ke alai 4 juta hektar udah diungkup ba pengawa betanam betupi, ku iya.