Hereward deka bediri minta pilih ba DUN Pakan maya PRN12
SIBU: Ex-Kaban Komiti Parti Keadilan Rakyat (PKR) Julau enggau Ketuai Ranting PKR Pampang Babai, Hereward Gramong madahka diri deka bediri minta pilih ba sitak Kunsil Nengeri (DUN) N47 Pakan,maya Pengawa Bepilih Nengeri (PRN) Ke12.
Hereward ke mega kala nyadi Mandal Ketuai Raban Nembiak II ba rintai komiti
Parti Rakyat Sarawak (PRS) ari taun 2016 nyentuk 2018, iya mih orang keterubah ti mantaika peminta diri ngambika bediri minta pilih ba kerusi DUN tu.
Ku Hereward, iya deka bediri minta pilih nengah Parti Sarawak Bersatu (PSB) nyatup penyandang kerusi nya.
Ke rikod, kerusi DUN Pakan diatu dipegai ex
Presiden Parti Demokratik Progresif Sarawak (SPDP) Tan Sri William Mawan, pengudah iya menang ba PRN ke-11.
Taja pia, Mawan diatu enda begulai enggau SPDP agi lalu iya udah nyemilik Parti Pesaka Bumiputera Bersatu (PBB).
Ba PRN ke-12, SPDP nukar baru nama parti nya kena bulan November 2017 ngagai
Parti Demokratik Progresif (PDP) lalu udah tentu enggai meri kerusi Pakan nya ngagai PBB.
Nitih ku Hereward, nengah gaya tu (politik) deka nyadi bekal ke beguna ungkup iya empu dikena ngulihka kerusi DUN nya.
“Aku udah mantaika juluk ati diri ngambika nyadi chalun ba PRN ti deka datai ngagai presiden parti Dato
Sri Wong Soon Koh.
“Ngarapka mensia mayuh ngelala aku, bepelasarka pengawa ti udah digaga sereta diberi aku,” ku iya lebuh ditelefon kemari.
Ex Kunsilor Opis Pelilih Menua Sarikei 2008/2016 tu mega madahka diri bulih sukung ari bala kaban iya ngambika bediri minta pilih ba pengawa bepilih tu ila.