Niang Awang Raweng teladan dalam megai pengawa enggau komited, ngembuan ati berani

KUCHING: Sapit Kepala Menteri Datuk Amar Douglas Uggah Embas mandangka niang Dato Awang Raweng siku soldadu ke pemadu manah Sarawak.

Ku iya, Awang Raweng iya nya teladan dalam dedikasyen ba kereja enggau tanggungpengawa sereta ngembuan ati ti berani.

“Semua rayat Sarawak kelebih agi komuniti Dayak deka ngasaika pemuang iya.

“Tang niang deka seruran dikeingat belama... Nyadi siku lagenda moden Sarawak,” ku Uggah nengah penerang iya.

Niang diberi anugerah pingat George Cross, ti diberi nama nyerumba nama King George VI, ari Ratu England kena November 1951 kena ngenukuka pengawa iya ngelaban urung 50 iku komunis ba kampung Kluang, Johor kediri aja nyelamatka soldadu British ke bisi kena bakal.

“Rayat Sarawak mega sinu ati enggau sida niang sebilik, aku ngarika semua rayat meri penyinu ati ngagai sida sebilik,” ku iya nambah.

Awang Raweng ke mega bujang berani menua enggau ex-raban Iban Tracker maya jeman kolonial British, Datuk Awang Raweng, 104 udah nadai ba rumah anak iya di Taman Padri, Sri Aman urung 200 km ari ditu kena pukul 2.15 lemai ensana.

Nitihka penerang, berita nya ditukuka anak iya, Panggu Awang ti madahka bangkai niang diatu ba rumah iya sebedau dibai ngagai Dewan Suarah Kuching pagila ba pengawa meri basa kepenudi renggat nengeri ngagai iya.

Niang dibai ngagai Gerija St Thomas Kuching sehari tu sebedau dikubur ba Pendam Pahlawan (Heroes Memorial) Taman Budaya Kuching.

Awang Raweng siku raban Iban Tracker ti datai ba Tanah Melayu urung Disember 1950 sebedau dipasuk dalam Rejimen Hutan Wordcestershire and Sherwood.