Pengawa meri basa kepenudi niang Awang Raweng udah diatur ba Dewan Suarah Kuching
KUCHING: Bangkai niang Bujang Berani menua Datuk Sarjan (B) Awang Raweng ke mega ex-raban Iban Tracker diberi tanda basa kepenudi ba Dewan Suarah ditu.
Pengawa meri basa kepenudi renggat nengeri nya dibuka ngagai mensia mayuh enggau orang pemesai berengkah pukul 1.30 lemai kemari pengudah bangkai niang sangkai ari Sri Aman.
Sekretari perintah nengeri, Datuk Amar Jaul Samion dikerandau pengarang berita madahka bangkai niang datai urung pukul 12.00 ngalihari kemari disambut rasmi bala pemesai soldadu enggau iya empu ngarika perintah nengeri.
Ke penerang, bangkai niang deka diberi basa kepenudi nitihka adat nyengaie nengeri enggau adat nitih pengawa soldadu.
“Bangkai niang diengkah ba Dewan Suarah Kuching tu ngambi mensia mayuh enggau pemesai ulih meri basa kepenudi ngagai niang.
“Pagila (sehari tu) pengawa meri basa kepenudi nya dibuka ngagai mensia mayuh sereta bala pemesai ari pukul 8.00 pagi nyentuk 11.00 pagi sebedau dianjung ngagai Pendam Bujang Berani deka dikuburka,” ku iya.
Sama ngenataika penyinu ati enggau pemidang niang, Jaul madahka niang maya bejalaika servis nyadi Iban Tracker udah besabung nyawa ke pengelikun menua.
Ketegal pemerani enggau pengawa iya nya, niang diberi basa nitihka adat nyengaie nengeri ari perintah nengeri.
Kelimpah diberi basa enggau chara nyengaie nengeri, perintah nengeri ku iya deka berundingka sukut bantu ke bukai ti diguna aris niang ke tanda ngenang pemerani niang.
Berebak enggau nya, gaya sunyi tampak dipeda ba Dewan Suarah Kuching kemari lebuh niang sebilik, mensia mayuh enggau bala pemesai meri basa kepenudi ngagai niang.
Antara ke bisi datai meri basa kepenudi iya nya Sapit Kepala Menteri Tan Sri James Jemut Masing enggau ex-Sapit Kepala Menteri Datuk Patinggi Tan Sri Alfred Jabu Numpang.
Dulu agi ari tu, Panglima Soldadu 3 Briged, Jeneral Dato Azhar Ahmad enggau ex-Panglima Medan Timur Soldadu Darat, Leftenan Jeneral (B) Datuk Stephen Mundaw ke mega penyanding penemu Gerempung Veteran Raban Periman Malaysia (PVATM) entara ke bisi datai sereta nyambut bangkai niang Awang di Dewan Suarah Kuching.