Niang Awang Raweng patut diberi basa kepenudi ngena adat nyengaie nengeri, soldadu
KUCHING: Niang Datuk Sarjan (B) Awang Raweng engkeman diberi basa kepenudi nitihka chara ngintu adat nyengaie nengeri enggau raban soldadu.
Sapit Kepala Menteri Tan Sri James Jemut Masing madahka niang iya nya siku penerima tunggal Pingat George Cross ari Ratu England.
“Aku andal perintah nengeri nyengaie niang ngena adat nyengaie nengeri laban niang endang patut diberi basa nya.
“Niang patut lama udah ditukuka lalu niang tu kebendar mensia mayuh ti udah diberi basa tetinggi Pingat George Cross,” ku iya.
Iya bejaku munyi nya lebuh ti datai ba pengawa nyengaie meri basa kepenudi niang Awang Raweng ba Dewan Suarah Kuching ditu, kemari.
Ku Masing nambah, nyema niang tu soldadu ti dirintai dalam soldadu British, niang deka bulih Pingat Victoria Cross.
Tang laban niang ukai soldadu ti dirintai British menya lalu semina bestatus mensia mayuh (raban ‘tracker’ suba), nya alai gelar tetinggi iya nya George Cross.
Ku Masing nambah, iya kala sama enggau mantu niang berapa taun ke udah lebuh niang dikangau datai ba pengerami ngintu hari pengada Ratu England.
“Nya alai, Parti Rakyat Sarawak (PRS) mantu ngumpul belanja kena nganjung niang enggau dua uchu lelaki iya.
“Paling enda, aku kala mantu niang enggau naka ulih,” ku iya ke mega Presiden PRS.
Beserimbai enggau nya, Masing mega nangkan rayat nengeri tu enda ngira bansa enggau jalai pengarap ngambika meri basa ngagai sida ti udah bebendar enda ngira seput diri nyaga pengelikun menua.
Ku iya, pemidang niang tu meri pengerugi ngagai Sarawak kelebih agi, laban niang Awang Raweng iya nya raban ‘iban Tracker’ kepenudi di nengeri tu.