KUCHING: Tanggungpengawa ti enda mida penempa sekalika lelaki tauka indu nyadi siti peluang ngagai orang indu nyadi ketuai ba renggat tetinggi lalu ulih ngaul diri dalam ngaga pemutus kena nentuka pengelantang raban bansa.
Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah madah munyi nya seraya pechaya deka mayuh agi pengawa patut dipejalai dalam nyapai juluk nya.
“Pengawa ngatur menua sereta nyadi ketuai ba renggat ejensi perintah diatu baru mantaika 20.4 peratus pangku pengawa tu lalu nya agi ba baruh juluk kebendar iya nya 30 peratus sebedau manggai ba taun 2030.
“Ketegal mayuh pekara, orang indu kitai suah agi tinggal di belakang ari sukut ngaul diri dalam komuniti, opis perintah tauka politik ti ulih mai ngagai pemansang rama ti ideal.
“Pekara tu patut diubah laban penemu ari runding orang indu mega diguna ngambika ulih dikena dalam bejalaika polisi rama,” ku iya lebuh ti bejaku ba Pengerami Makai Lemai Meri Basa Pati Raban Indu Gerempung Bansa Dayak Bidayuh (DBNA) ditu, lemai kilah ensana.
“
Pengawa ngatur menua sereta nyadi ketuai ba renggat ejensi perintah diatu baru mantaika 20.4 peratus pangku pengawa tu lalu nya agi ba baruh juluk kebendar iya nya 30 peratus sebedau
” manggai ba taun 2030.
Dato Sri Fatimah Abdullah
Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit
Penyereta sereta peluang ti enda bechiping ti diberi ngagai orang indu endang beguna laban pengawa sereta sukung
sida tu bela nimbal manah tanggungpengawa lelaki dalam pemansang menua, ku iya nyemetak.
Iya ba pengerami nya mega ngansak orang ti ngaga pemutus ba renggat tetinggi ngambika orang indu Bidayuh diberi peluang sama megai pangku pengawa tetinggi dalam komuniti baka nyadi Penghulu, Temenggong tauka Pemancha.
“Orang indu Bidayuh mega endang komited sereta ngambuan pelajar, nyulut enda alah enti dibanding enggau raban bansa bukai di Sarawak lalu tu nyata Pati Raban Indu DBNA mega sama negika ‘1 ati, 1 runding, 1 Bidayuh’ iya nya pemansang ti meruan ba lumur 5 dalam Pertubuhan
Bangsa-bangsa Bersatu (UN) ti nyadika nya endang relevan,” ku iya nambah.
Fatimah mega nyukung pengeransing pengawa pati raban indu DBNA dalam nagang sereta bejalaika bemacham pengawa advokasyen ungkup komuniti Bidayuh sentang isu penyalah gian dadah, lalu mega diperansang bekerejasama enggau Kaunsil Pemansang Rama ba opsi menteri iya ngambika ngatur mayuh agi aktiviti enggau kimpin pemereti ati jemah ila.
Beserimbai enggau nya, iya mega muji pengawa DBNA laban ti seruran ngetanka penyelai main asal bansa Bidayuh seraya minta mayuh agi orang indu bansa nya bedagangka produk sida nengah chara ‘on-line’ kelebih agi ungkup bala indu ti diau ba rumah enggau indai tunggal.
Ba pengerami nya, Fatimah udah ngemendarka agih belanja sepenyampau RM5,000 ngagai DBNA.
Pengerami nya udah sama bisi digulu Chairman DBNA Datu Ik Pahon Joyik, Chairman Pati Raban Indu DBNA, Kaban Komiti Tetinggi Theresa Dunstan.