Mensia mayuh dilalau nganjung ukui betuchuk vaksin kena nagang Rabies
SIBU: Urung 30 nyentuk 40 kes diketup ukui diripotka ba Bagi Menua Sibu ninting minggu kenyau berapa taun tu lalu tu mih siti kelai sereta jaku tangkan ngagai pengempu ukui ngambika nganjung jelu tupi sida betuchuk vaksin lalu ngurung ukui ba dalam kandang rumah.
Nitih ku Pemesai Opis Pengerai Bagi Menua Dr Teh Jo Hun, penyampau kes diketup ukui ba ditu apin nurun.
“Kes diketup ukui ti diripotka iya nya sepenyampau 30 nyentuk 40 kes ninting minggu ba bagi menua Sibu kenyau ari berapa taun ke udah, lalu penyampau kes tu apin nurun.
“Jaku lalau kami ngagai raban pengempu ukui iya nya ngambika nganjung jelu tupi sida betuchuk vaksin sereta ngurung ba dalam kandang rumah.
“Anang ngambi ukui siga tauka anak ukui nyadi jelu tupi. Anjung betuchuk vaksin enggau lengkas sebedau ngelakka anak kita bemain enggau anak ukui,” ku iya lebuh ditelefon pengarang berita, kilah ensanus.
Berindik ari nya, Chairman Opis Pelilih Menua Pesisir Sibu (SRDC) Sempurai Petrus Ngelai ngansak orang ti bisi nupi jelu nya ngambika jelu tupi sida iya ngembuan lisin enggau SRDC sereta minta ukui nya diberi vaksin.
“Baka ti udah ditemu kitai semua, rabies agi bisi ba kandang menua kitai. Kami apin ulih ngemunaska penanggul dirampit rabies kelebih agi ukui ke ditupi.
“Tebal agi kes diketup ukui diripotka nyadi iya nya endang ari ukui ke ditupi sida empu. Nya alai, kitai patut nyaga ukui ti ditupi kitai nya dalam rumah.
“Pekara ke pemadu beguna iya nya jelu tupi nya patut dianjung betuchuk vaksin,” ku iya nyemetak.
Berebak enggau tu, Sempurai madahka kerejasama ari mensia mayuh endang chukup beguna laban sida ulih mantu madah ngagai raban bekuasa ke bekaul enggau ukui ti mandangka kelai udah kena rampit penyakit rabies.
Nengah chara tu ku iya, raban ke bekuasa ulih nemu enggau lengkas bagi ukui ti udah kena rampit sereta ditangkap.
Kemaya hari tu, Sempurai nyamin senentang unit ukui SRDC deka majak ngiga ukui ti bekedayau ba jalai alun.
“Kami deka ngatur mayuh agi program kena ngelalau mensia mayuh nengah chara ngerembaika berita enggau program ti ngaul peranak ba sesebengkah palan, bekaul enggau rabies sereta COVID-19,” ku iya baru.