Gira: Projek PPRMS siti ari komitmen perintah Sarawak kena mantu rayat
SIBU: Projek Ngangkatmanah Rumah Orang Seranta Sarawak (PPRMS) endang siti ari komitmen perintah Sarawak ti deka diteruska ari baruh Gabungan Parti Sarawak (GPS), dalam mantu raban ti begunaka bantu kelebih agi ungkup peranak ba kandang Kunsil Nengeri (DUN) Tamin.
Kaban Kunsil Nengeri (ADUN) Tamin, Christopher Gira Sambang madah, sekeda ari projek PPRMS 2019 (bantu barang perengkaguna) ba sitak DUN Tamin udah tembu dipejalaika enggau chara beripai.
“Entara rumah panjai ti nerima bantu iya nya Rumah (Rh) Chendai ba Pelugau Balingian, Rh Mawan (Sungai Anus Balingian), Rh Chindun (Kemena Balingian), Rh Albert Lapuk (Pelugau Balingian), Rh Miggi (Jalai Spur, Batu 21 Sibu) enggau Rh Uta (Pelugau Balingian),” ku iya lebuh ditelefon pengarang berita empai lama.
Nitih ku iya, perintah Sarawak udah ngagihka belanja penyampau RM1 juta setaun kena bejalaika PPRMS ba kandang DUN Tamin.
“Belanja nya diagihka dua kali setaun, lalu tetiap agih tu iya nya sepenyampau RM500,000,” ku iya.
Ku iya baru, belanja PPRMS ungkup taun 2020 ba sitak DUN Tamin apin dikena agi.
“Pengudah PPRMS 2019 tembu, baru belanja ungkup PPRMS 2020 dipansutka,” ku iya nambah.
Berebak enggau tu, Gira ngansak peranak rumah panjai ti udah nerima bekal barang perengkaguna nengah
PPRMS nya ngambi bejalaika pengawa ngaduka rumah enggau lengkas.
“Tu beguna bendar laban belanja PPRMS ke bukai deka diagihka pengudah pengawa ngaduka rumah nya tembu memagang,” ku iya.
Nangkanka tu, iya ngarapka peranak rumah panjai ti udah minta PPRMS sereta apin nerima barang perengka kena ngaga rumah nya liat ati nganti.
“Aku ngarapka sida ti udah minta tang apin nerima barang perengka nya, ulih liat ati nganti. Enti belanja nya udah bisi, aku deka ngagihka bantu nya,” ku iya baru.
Ke penemu rama, projek PPRMS tu iya nya inisiatif perintah Sarawak kena neruska pengawa mantu rayat ti seranta ba Sarawak pengudah perintah besai ngetuka pengawa nya.
Projek tu deka nentuka sida ti patut nerima bantu tu deka ngembuan rumah ti likun sereta lantang alai diau.